ಅಂತೋನಿಕಟ್ಟೆಂತ್ಲಿ ಬೆಸಾಂವಾಂ ಆನಿ ಆಜಾಪಾಂ

ಆಧುನಿಕ್ ಕಾಳಾರ್ ಅಮ್ಚ್ಯಾ ಭೊಂವಾರಿಂ ಸರ್ವ್ ಶೆತಾಂನಿ ಬದ್ಲಾವಣೆಚೆಂ ವ್ಹಾರೆಂ ಬರ್‍ಯಾನ್ ವ್ಹಾಳ್ತಾ. ಆಜ್ ಬೌಗೋಳಿಕ್ ಪ್ರಕೃತೆಂತೀ ದಿಸಾನ್ ದೀಸ್ ಬದ್ಲಾವಣ್ ಜಾಂವ್ಚಿ ಆಮಿ ಪಳೆತಾಂವ್. ಅಶೀರ್ ರಸ್ತೊ ರಾಜ್ಯ್ ರಸ್ತೊ ಜಾವ್ನ್ ಬದಲ್ತಾನಾ, ಗುಡೆ ದೊಂಗೊರ್ ಸಮಥಟ್ಟ್ ಜಾವ್ನ್ ಪಾಲ್ಕಿಂ ಭರುನ್ ಆಜ್ ತ್ಯಾ ಜಾಗ್ಯಾರ್ ಮಜ್ಬೂತ್ ಬಾಂದ್ಪಾಂ ಸೊಬ್ತಾತ್. ಆಸಲ್ಯಾ ಬದ್ಲಾವಣೆಚ್ಯಾ ಕಾಳಾರ್ ಕರಂಬಾರ್ ಲಾಗಿಂ ಆಸ್‌ಲ್ಲ್ಯಾ ಕಾರೊಡಿ ಘಾಟಿಲಾಗಿಂ ಆಮಿ ಸರಿಸುಮಾರ್ 20-22 ವರ್‍ಸಾಂ ಪಾಟಿಂ ಗೆಲ್ಯಾಂವ್ ತರ್, ಥಂಯ್ಸರ್ ಆಸ್‌ಲ್ಲೊ ಅಶೀರ್ ಮಾರಗ್ ರಾಜ್ಯ್ ರಸ್ತೊ ಜಾವ್ನ್ ಬದ್ಲಲಾ.

 ಥಂಯ್ಸರ್ ಆಸ್‌ಲ್ಲೊ ಗುಡೊ ಸಮತಟ್ಟ್ ಜಾವ್ನ್ ಆಕರ್ಷಿಕ್ ಕ್ಯಾಂಪಸ್ ಜಾವ್ನ್ ಬದಲ್ತಾನಾ, ತಾಂತುಂ ಸೊಬ್ಚಿ ಸಾಂತ್ ಅಂತೊನಿಕ್ ಸಮರ್ಪಿಲ್ಲಿ ಇಗರ್‍ಜ್, ಆಜ್ ಏಕ್ ಪೂನ್-ಥಳ್ ಜಾಂವ್ಕ್ ಪಾವ್ಲಾಂ.  ದೆವಾನ್ ದೆ| ವರ್ನನ್ ವಾಸ್ ಬಾಪಾಚ್ಯಾ ಮುಕಾಂತ್ರ್, ತಶೆಂಚ್ ಉದಾರ್ ಮನಾಚ್ಯಾ ದಾನಿಂಚ್ಯಾ ಆಧಾರಾನ್ ಆನಿ ಬರ್‍ಯಾ ಮನಾಚ್ಯಾ ಮನ್ಶಾಂಚ್ಯಾ ಸಹಕಾರಾನ್ ಥಂಯ್ಸರ್ ಉಭಾರುಲ್ಲೊ ಸಾಂತ್ ಆಂತೊನಿಚೊ ಗ್ರೊಟ್ಟೊ ಪಯ್ಣಾರ್‍ಯಾಂಕ್ ಕುರ್ಪೆಚೆಂ ಥಳ್.

‘ಸಾಂತ್ ಆಂತೊನ್ ವಯ್ರ್ ಯೆತಾನಾ ರಾಕ್ತಾ, ಸಕಯ್ಲ್ ಯೆತಾನಾ ರಾಕ್ತಾ’ ಆಸಲಿಂ ಉತ್ರಾಂ ಸಾಂಗೊನ್ ಥಂಯ್ಸರ್ ಗ್ರೊಟ್ಟ್ಯಾಚಿ  ಸುರ್ವಾತ್ ಕೆಲ್ಲಿ ದೆ| ಬಾ| ವರ್ನನ್ ವಾಸಾನ್. 13.08.20085ವೆರ್ ಉಗ್ತಾವಣ್ ಜಾಲ್ಲೊ ಹೊ ಸಾಂತ್ ಆಂತೊನಿಚೊ ಗ್ರೊಟ್ಟೊ, ತವಳ್ ಥಾವ್ನ್ ಆಜ್ ಪರ್ಯಾಂತ್ ಜಾಯ್ತ್ಯಾ ಸಾಂತ್ ಆಂತೊನಿಚ್ಯಾ ಭಕ್ತಿಕಾಂಕ್, ತಶೆಂಚ್ ತ್ಯೆ ವಾಟೆನ್ ಪಯ್ಣ್ ಕರ್‍ಚ್ಯಾ ಸರ್ವ್ ಜಾತಿ-ಕಾತಿಚ್ಯಾ ಲೊಕಾಂಕ್, ಏಕ್ ಭರ್ವಶ್ಯಾಚೆಂ ಕೀರ್ಣ್ ಜಾಂವ್ಕ್ ಪಾವ್ಲಾ. ಆಪ್ಲ್ಯಾ ಎಕಾ ಹಾತಾಂತ್ ಬಾಳ್ಕಾ ಜೆಜುಕ್ ಘೆವ್ನ್ ಆನ್ಯೆಕ್ ಹಾತ್ ಆಶೀರ್ವಾದ್ ದಿಂವ್ಚ್ಯಾ ರುಪಾನ್ ಉಬಾರ್‍ನ್ ಆಸ್ಚ್ಯಾ ಆಂತೋನಿಕಟ್ಟೆಚ್ಯಾ ಸಾಂತ್ ಆಂತೊನಿಕ್ ಜಾಯ್ತ್ಯಾ ಜಾತಿ ಕಾತಿಚೊ ಲೋಕ್ ತ್ಯೆ ವಾಟೆರ್ ಆಶಾರ್ ಪಾಶಾರ್ ಜಾತಾನಾ, ತಾಕಾ ಬಾಗ್ವೊನ್ ನಮಾನ್ ಪಾಟಯ್ತಾತ್. ಜಾಯ್ತೊ ಲೋಕ್ ತಾಚೆ ಸರ್ಶಿನ್ ಯೇವ್ನ್ ವಾತಿ ಪೆಟವ್ನ್ ಮಾಗ್ತಾತ್, ತೆಸಾಂವಾಂ ಘಾಲ್ತಾತ್, ಆರ್ಗಾಂ ಪಾಟಯ್ತಾತ್. ತಾಚೆರ್ ಪಾತ್ಯೆಣಿ ದವರ್‍ನ್ ಮಾಗ್‌ಲ್ಲ್ಯಾ ಭಕ್ತಿಕಾಂಕ್ ಸಾಂತ್ ಆಂತೊನಿನ್ ಕೆದಿಂಚ್ ನಿರಾಶಾ ದಾಕವ್ನಾ. ತ್ಯೆ ವಾಟೆರ್ ರಾತಿಂಚೆಂ ಪಯ್ಣ್ ಕರ್‍ಚ್ಯಾ ವಾಟ್ಸುರ್‍ಯಾಂಕ್ ನಾಡಿ ರುಪಾರ್ ಆಡ್ ಯೆಂವ್ಚೊ ಸೊಂಸೊ ಆಜ್ ನಪಂಯ್ಸ್ ಜಾಲಾ, ಆನಿ ಆಶಿಂ ಜಾಯ್ತಿಂ ಆಜಾಪಾಂ, ಬೆಸಾಂವಾಂ, ಉಪ್ಕಾರ್ ಸಾಂತ್ ಆಂತೊನಿ ಮುಕಾಂತ್ರ್ ಜಾಲ್ಯಾಂತ್.  ತಾಂತ್ಲಿಂ ಥೊಡಿಂ:-

ಕೊಪೆಲ್, ಕಾಮೆಲಿ ಆನಿ ಕಾರ್: ಕೊಪೆಲ್ ಆನಿಂ ಗ್ರೊಟ್ಟ್ಯಾಚೆಂ ಉಗ್ತಾವಣ್ ಜಾಂವ್ಚ್ಯಾ ಆದಿಂ ಸಾಂತ್ ಆಂತೊನಿಚ್ಯಾ ಕೊಪೆಲಾಚ್ಯಾ ಬಾಂದ್ಪಾಚ್ಯಾ ವಾವ್ರಾಕ್ ಯೆಂವ್ಚೆ ಸರ್ವ್ ಕಾಮೆಲಿ ಹರ್‍ಯೇಕ್ ದೀಸ್ ದಿಸ್ಪಡ್ತೊ ವಾವ್ರ್ ಸಂಪವ್ನ್ ಬಸ್ಸಾರ್ ಪಾಟಿಂ ಘರಾ ವೆಚ್ಯಾಕ್ ಆತಾಂ ಗ್ರೊಟ್ಟೊ ಆಸ್‌ಲ್ಲ್ಯಾ ಮುಕಾರ್ ತವಳ್ ಆಸ್‌ಲ್ಲ್ಯಾ ದೊರ್‍ಯಾಚೆರ್ ಬಸ್ತಾಲೆ. ಏಕ್ ದೀಸ್ ಎಕ್ಲೊಯ್ ಕಾಮೆಲಿ ತ್ಯೆ ಸುವಾತೆರ್ ಬಸನಾಸ್ತಾನಾ ಹೊರೆವಿಂಗಡ್ ರಾವುಲ್ಲೆ. ತ್ಯಾ ದಿಸಾ ಹರ್ಶೆಂ ಬಸ್ಚ್ಯೆ ಸುವಾತೆರ್ ವೆಗಾನ್ ಏಕ್ ಕಾರ್ ಯೇವ್ನ್ ತ್ಯೆ ಸುವಾತೆಕ್ (ದೊರ್‍ಯಾಕ್) ಮಾರ್‍ನ್  ಕಾರ್ ಸಕಯ್ಲ್ ಮೈದಾನಾರ್ ಪಡ್ಲೆಂ. ತ್ಯಾ ದಿಸಾ ಕೊಪೆಲಾಚ್ಯಾ ವಾವ್ರಾಕ್ ಯೆಂವ್ಚ್ಯಾ ಸರ್ವ್ ಕಾಮೆಲ್ಯಾಂಕ್ ತಶೆಂಚ್ ಕಾರಾರ್ ಪಯ್ಣ್ ಕರ್‍ಚ್ಯಾ ಪಯ್ಣಾರ್‍ಯಾಂಕ್ ಸಾಂತ್ ಆಂತೊನಿನ್ ರಕ್ಷಣ್ ಕೆಲೆಂ ಮ್ಹಣ್ ಆಜೂನಿಯೀ ಸಾಂಗ್ತಾ ಸಾಂತ್ ಆಂತೊನಿಚೆಂ ಕೊಪೆಲ್ ಬಾಂದಯಿಲ್ಲೊ ಮಾನೆಸ್ತ್ ಆರ್ಥರ್ ಪಿರೇರ್.

ಭರ್‌ಲ್ಲಿ ಜಲ್ಲಿ ಆನಿ ಪರ್‍ತಾಲ್ಲಿ ಲೊರಿ: ಎಕಾ ದಿಸಾ ಮಂಗ್ಳಾರಾ ನೊವೆನ್ ಜಾವ್ನ್ ಕೊಪೆಲ್ ಬಂಧ್ ಕರ್‍ನ್ ಬಾ| ಮೆಲ್ವಿನಾ ಸಂಗಿ ಚಲೊನ್ ಪಾಟಿಂ ಯೆತಾನಾ, ಗ್ರೊಟ್ಟ್ಯಾಚ್ಯಾ ವಯ್ರ್ ರಸ್ತ್ಯಾರ್ ಏಕ್ ವಾಹನ್ ಅವ್ಗಡಾಚೊ ಆವಾಜ್, ತಶೆಂಚ್ ಲೊಕಾಚಿ ಬೊಬ್ ಆಯ್ಕಾಲಿ. ವಿಗಾರಾ ಸಂಗಿಂ ತುರ್‍ತಾನ್ ಆಮಿ ಥಂಯ್ಸರ್ ಪಾವ್ಲ್ಯಾಂವ್. ದೆಖ್ತಾನಾ ಕಳೊನ್ ಆಯ್ಲೆಂ, ‘ಸಂತೋಷ್-ಜೀವನ್’ ನಾಂವಾಚಿ ಏಕ್ ಟಿಪ್ಪರ್ ಲೊರಿ ಕೊರ್‍ಯಾಂತ್ ಥಾವ್ನ್ ತ್ಯಾ ದಿಸಾಚೆಂ ಕಾಮ್ ಸಂಪವ್ನ್ ಪಾಟಿಂ ಯೆತಾನಾ ಲೊರಿಭರ್‍ನ್ ಜಲ್ಲಿ ಘೆವ್ನ್ ಯೆತಾನಾ ತ್ಯೆ ಜಲ್ಲ್ಯೆ ವಯ್ರ್ 7-8 ಜಣಾಂ ದಾದ್ಲೆ ಆನಿ ಸ್ತ್ರಿಯೊ ಕಾಮೆಲಿ ಆಸ್‌ಲ್ಲಿಂ. ಗ್ರೊಟ್ಟ್ಯಾ ವಯ್ಲ್ಯಾ ರಸ್ತ್ಯಾರ್ ಲೊರಿ ಸಕಯ್ಲ್ ದೆಂವೊನ್ ಯೆತಾನಾ, ಬ್ರೇಕ್ ಫೈಲ್ ಜಾಲ್ಲಿ ಮ್ಹಣ್ ಕಳ್ತಚ್ ಚಾಲಕಾನ್ ಲೊರಿ ದೆಗೆನ್ ಆಸ್‌ಲ್ಲ್ಯೆ ಚರಂಡಿಕ್ ದೆಂವೆಯ್ಲಿ.

ಪೂಣ್ ಲೊರಿ ರಾಂವ್ಚ್ಯೆ ಬದ್ಲಾಕ್ ಚರಂಡಿ ಥಾವ್ನ್ ವಯ್ಲ್ಯಾ ಗುಡ್ಯಾಕ್ ಚಡ್ಲಿ ಆನಿ ರಸ್ತ್ಯಾಕ್ ಸಮಾ ಆಡ್ ಪರ್‍ತಾಲಿ. ಸಗ್ಳಿಂ ಕಾಮೆಲಿ ರಸ್ತ್ಯಾಕ್ ಉಚಾಳ್ಳಿಂ, ತಾಂಚೆ ವಯ್ರ್ ಜಲ್ಲಿ ಪಡ್ಲಿ. ಚಾಲಕಾಚ್ಯೆ ತಕ್ಲ್ಲೆಕ್ ಘಾಯ್ ಜಾವ್ನ್ ರಗತ್ ದೆಂವ್ತಾಲೆಂ. ಬಾ| ಮೆಲ್ವಿನಾನ್ ಏಕ್ ತುವಾಲೊ ಘೆವ್ನ್ ರಗತ್ ದೆಂವ್ಚೆ ಕಡೆನ್ ತಕ್ಲೆಕ್ ತುವಾಲ್ಯಾನ್ ಬಾಂದ್ಲೆಂ. ಸರ್ವ್ ಕಾಮೆಲ್ಯಾಂಕ್ ಜಲ್ಲ್ಯೆ ಪಂದಾ ಥಾವ್ನ್ ಕಾಡ್ಲೆಂ. ತೆದೊಳ್ ಮ್ಹಣಾಸರ್ ಲೊರಿ ಚಾಲು ಆಸ್‌ಲ್ಲಿ ಪಳೆವ್ನ್ ಮುಕ್ಲ್ಯಾ ಘರ್‍ಚ್ಯಾ ಫೆಲಿಸಾಮಾನ್ ಲೊರ್‍ಯೆ ಭಿತರ್ ರಿಗುನ್ ಲೊರಿ ಬಂಧ್ ಕೆಲಿ. ಇತ್ಲೆಂ ವ್ಹಡ್ ಆವ್ಘಡ್ ಜಾಲ್ಯಾರಿ, ಜಾಂವ್ ವಾಹನಾಕ್ ವಾ ಕಾಮೆಲ್ಯಾಂಕ್ ಜಿವಾಕ್ ಬಾದಕ್ ಜಾಂವ್ಕ್ ನಾ. ದೆ| ಬಾ| ವರ್ನನ್ ವಾಸಾನ್ ಸಾಂಗ್‌ಲ್ಲೆ ಬರಿಂಚ್ ಸಾಂತ್ ಆಂತೊನಿನ್ ಸಕಯ್ಲ್ ಯೆತಾನಾ ಸರ್ವಾಂಕ್ ಆವ್ಘಡಾಂತ್ಲೆಂ ರಾಕ್‌ಲ್ಲೆಂ.

ರಿಪೇರಿ ಜಾಯ್ನಾತ್‌ಲ್ಲೆಂ ಕಾರ್ ಆನಿ ಜೊಡ್ಯಾಚೊ ಜೀವ್: ಆಂತೋನಿಕಟ್ಟೆ ಸಾಂತ್ ಆಂತೊನಿಚೊ ಭಕ್ತಿಕ್ ಜಾವ್ನಾಸ್ಚೊ ಹಾಂವ್ ಜೋನ್ ವಿಲಿಯಂ ರೇಗೊ ಆನಿ ಲುವಿಜಾ ರೇಗೊ 25-05-2013ವೆರ್ ಆಮ್ಚ್ಯಾ ಕಾರಾರ್ ಪೂತ್ ಬ್ರಾಯನ್ ಆನಿ ತಾಚ್ಯಾ ಇಷ್ಟಾ ಸಂಗಿಂ ಮಂಗ್ಳುರ್ ಥಾವ್ನ್ ಪಾಟಿಂ ಯೇವ್ನ್ ಆಸ್‌ಲ್ಲ್ಯಾಂವ್. ಆಂತೋನಿಕಟ್ಟೆ ಗ್ರೊಟ್ಟೊ ಉತ್ರುನ್ ಮುಕಾರ್ ಚಲ್ತಾಸ್ತಾನಾ ಮುಕ್ಲ್ಯಾನ್ ಜಲ್ಲಿ ಘೆವ್ನ್ ಯೆಂವ್ಚಿ ವ್ಹಡ್ ಲೊರಿ ವಾಂಕ್ಡ್ಯೆ ವಾಟೆನ್ ಆಯ್ಲಿ. ಡ್ರೈವರ್ ಮೊಬಾಯ್ಲಾರ್ ಉಲೊನ್ ಆಸ್‌ಲ್ಲೊ. ಹೆಂ ದೆಕ್ತಚ್ ಹಾಂವೆಂ ಮ್ಹಜೆಂ ಕಾರ್ ಜಾತಾತಿತ್ಲೆ ದೆಗೆರ್ ವೆಲೆಂ, ಜಾಲ್ಯಾರೀ ಲೊರಿ ಡ್ರೈವರಾನ್ ತಾಚಿ ಲೊರಿ ಆಮ್ಚ್ಯಾ ಕಾರಾಕ್ ಮುಕಾರ್‌ಚ್ ಆಪ್ಟಾಯ್ಲಿ. ಆನಿ ಸುಮಾರ್ ಪಾಟಿಂ ಮ್ಹಣಾಸರ್ ಲೊಟುನ್ ವೆಲೆಂ. ಆಶಾರ್ ಪಾಶಾರ್ ಜಾಂವ್ಚ್ಯಾ ವಾಹನಾಂನಿ ಬೊಬ್ ಘಾಲ್ತಚ್ ಲೊರಿ ಡ್ರೈವರಾನ್ ತಾಚಿ ಲೊರಿ ರಾವೊನ್ ತೊ ಧಾಂವ್ಲೊ. ಜಾಯ್ತೊ ಲೋಕ್ ತ್ಯೆ ಘಡಿಯೆ ಆಮ್ಚ್ಯೆ ಕುಮ್ಕೆಕ್ ಆಯ್ಲೊ. ಮ್ಹಾಕಾ ೩ ಮಹಿನೆ ಆನಿ ಮ್ಹಜ್ಯ್ಯೆ ಪತಿಣೆಕ್ 3 ಮಹಿನೆ ಚಿಕಿತ್ಸಾ ಕರಿಜಯ್ ಪಡ್ಲಿ. ಆಮ್ಚೆಂ ಕಾರ್ ಮುಕಾರ್ ರಿಪೇರಿ ಕರುಂಕ್ ವಾ ತಾಂತುಂ ಪಯ್ಣ್ ಕರ್‍ಚ್ಯೆ ಸ್ಥಿತೆರ್ ನಾತ್‌ಲ್ಲೆಂ. ಪೂಣ್ ಸಾಂತ್ ಆಂತೊನಿನ್ ಆಮ್ಚೊ ಜೀವ್ ತ್ಯಾ ದೀಸ್ ಅನ್ವಾರಾಂತ್ಲೊ ರಾಕ್‌ಲ್ಲೊ.

–           ಜೋನ್ ವಿಲಿಯಂ ರೇಗೊ, ಬಜ್ಪೆ

(ಬೊಕ್ಸ್) ಭಾವಾಡ್ತ್ ಆನಿ ಭಾಂಗಾರ್: 11 ವರ್‍ಸಾಂ ಆದಿಂ ಬಜ್ಪೆಚ್ಯಾ ಎಕಾ ರಾಷ್ಟ್ರಿಕೃತ್ ಬ್ಯಾಂಕಾಂತ್ ಎಕ್ಯೆ ಚಲಿಯೆನ್ ಆಡೊವ್ ದವರ್‌ಲ್ಲೆಂ ಭಾಂಗಾರ್ ಸೊಡವ್ನ್ ಪಾಟಿಂ ವರ್‍ತಾನಾ, ತಾಂತುಂ ಥೊಡೆಂ ಭಾಂಗಾರ್ ಉಣೆಂ ಆಸ್‌ಲ್ಲೆಂ ಮ್ಹಣ್ ತಿಕಾ ಭೊಗ್ಲೆಂ. ತಿಣೆಂ ಬ್ಯಾಂಕ್ ಮ್ಯಾನೆಜರಾಕ್ ತಿಳ್ಸಿಲೆಂ. ಚಲಿಯೆನ್ ಸಾಂಗ್‌ಲ್ಲೆಂ ಸಾರ್ಕೆಂ ಮ್ಹಣ್ ಕಳ್‌ಲ್ಲೆಂಚ್ ಮ್ಯಾನೆಜರಾನ್ ಬ್ಯಾಂಕಾಂತ್ ಗ್ರಾಹಕಾಂನಿ ಆಡೊವ್ ದವ್‌ರ್‌ಲ್ಲೆಂ ಭಾಂಗಾರ್ ಪರಿಶೀಲನ್ ಕರ್‍ತಾನಾ ಸರಿ ಸುಮಾರ್ ರು. 20 ಲಾಕ್ ಪ್ರಾಸ್ ಚಡ್ ಮೊಲಾಚೆಂ ಭಾಂಗಾರ್ ನಪಂಯ್ಚ್  ಜಾಲ್ಲೆಂ ದಿಸೊನ್ ಆಯ್ಲೆಂ ಆನಿ ಬ್ಯಾಂಕಾ ಭಿತರ್‍ಲ್ಯಾ ಸಿಬಂದಿನಿಂಚ್ ಚೊರಿ ಕೆಲ್ಯಾ ಮ್ಹಣ್ ಕಳ್ಳೆಂ. ಬ್ಯಾಂಕಾ ಭಿತರ್‍ಲ್ಯಾ ಆಸ್ತಿಚೆಂ ರಕ್ಷಣ್ ಕರ್‍ತೆಲ್ಯಾಂಕ್ ಇತ್ಲಿ ಚೊರಿ ಜಾತಾ ಮ್ಹಣಾಸರ್ ಕಳೊಂಕ್ ನಾ ಮ್ಹಣ್ ಕಳ್ತಚ್ ತಾಂಕಾಂ ವೃತ್ತಿ ಥಾವ್ನ್ ಆಮಾನತ್ ಕೆಲೆಂ.

ಕೇಜ್ ಪೊಲಿಸಾಂಚ್ಯೆ ಹಾತಿಂ ಹಸ್ತಾಂತರ್ ಕೆಲಿ. ಬ್ಯಾಂಕಾಕ್ ಯೆಂವ್ಚ್ಯಾ ಹರೇಕಾ ಗ್ರಾಹಕಾನ್ ಥಂಯ್ಸರ್ ವಾವ್ರ್ ಕರ್‍ಚ್ಯಾ ಕಾಮೆಲ್ಯಾಂಕ್ ಚೊರಾಂಬರಿ ಪಳೆತಾನಾ ಏಕ್  ನಿತಿವಂತ್ ಅಕ್ರಿಸ್ತಾಂವ್ ವಾವ್ರಾಡ್ಯಾನ್ ಚೊರ್ ಮೆಳ್ಚ್ಯಾಕ್ ಕಂಕನಾಡಿ ಥಾವ್ನ್ ಕಟೀಲ್ ದಿವ್ಳಾ ಮ್ಹಣಾಸರ್ ಪಾಂಯ್ ವಾಟೆನ್ ಚಲೊನ್ ಮಾಗ್ಣೆಂ ಕೆಲೆಂ. ಪೂಣ್ ಕಿತೆಂಚ್ ಬರೆಪಣ್ ಜಾಂವ್ಕ್ ನಾ. ಅನ್ಯೇಕ್ ದೀಸ್ ತೊ ಆಂತೊನಿಕಟ್ಟೆ ಸಾಂತ್ ಆಂತೊನಿಚ್ಯಾ ಗ್ರೊಟ್ಟ್ಯಾಕ್ ಯೇವ್ನ್ ವಾತಿ ಪೆಟವ್ನ್ ಚೊರಾಕ್ ದಾಕವ್ನ್ ದಿಂವ್ಕ್ ಮಾಗಿಲಾಗ್ಲೊ. ದುಸ್ರ್ಯಾಚ್ ದಿಸಾ ಭಾಂಗಾರ್ ಚೊರ್‌ಲ್ಲ್ಯೆ ಸಿಬಂಧಿಕ್ ಪೊಲಿಸಾಂನಿ ಧರ್‍ಲೊ.

ಸೆವಾ ಆನಿ ದಿಸ್ಪಡ್ತಿಂ ಕಾಮಾಂ: ಹಾಂವ್ ಕೊರೊನಾ ಉಪ್ರಾಂತ್ ಭಲಾಯ್ಕಿ ಬರಿ ನಾಸ್ತಾನಾ ಡಿಪ್ರೆಶನಾಕ್ ಗೆಲ್ಲೊಂ. ‘ತುಂ ಘರಾಚ್ ಬಸನಾಕಾ, ಕೊಪೆಲಾಕಡೆ ಯೇ’ ಮ್ಹಣುನ್ ಬಾ| ಎಡ್ವಿನ್ ಪಿಂಟೊನ್ ಮ್ಹಾಕಾ ಆಪಯ್ಲೆಂ. ಇಗರ್ಜೆಚ್ಯಾ ಥೊಡ್ಯಾ ಭಾಯ್ಲ್ಯಾ ವಾವ್ರಾಂತ್ ಹಾಂವೆಂ ತಾಂಚೆ ಸಂಗಿಂ ಹಾತ್ ಮೆಳಯ್ಲೆ. ತ್ಯಾ ಉಪ್ರಾಂತ್ ಮ್ಹಜಿ ಭಲಾಯ್ಕಿ ಬರಿ ಜಾವ್ನ್ ಆಯ್ಲಿ. ಉಪ್ರಾಂತ್ ಇಗರ್ಜೆಂತ್ ಹಾಂವ್ ಸದಾಂಚ್ ಮ್ಹಜಿ ಸೆವಾ ದೀವ್ನ್ ಆಸಾಂ. ಹಾಂಗಾಸರ್ ದಿಸ್ಪಡ್ತಿ ಸೆವಾ ದಿಲ್ಲ್ಯಾನ್ ಮ್ಹಜಿಂ ಹೆರ್ ದಿಸ್ಪಡ್ತಿಂ ಕಾಮಾಂ ಸುಗಮ್ ಜಾವ್ನ್ ಚಲ್ತೆಚ್ ಆಸಾತ್.

– ಫೆಲಿಕ್ಸ್ ಕೊರೆಯಾ, ಆಂತೋನಿಕಟ್ಟೆ

45 ವರ್‍ಸಾಂಚೆಂ ಭಕ್ತಿಪಣ್: ಹಾಂವ್ ಲ್ಹಾನ್ ಥಾವ್ನ್ ಸಾಂತ್ ಆಂತೊನಿಚೊ ಭಕ್ತಿಕ್. 1980 ಇಸ್ವೆಂತ್ ಸಾಂತ್ ಆಂತೊನಿಚೆಂ ನೊವೆನ್ ಹಾಂವೆಂ ಮಂಗ್ಳುರ್ ಮಿಲಾರ್ ಇಗರ್ಜೆಂತ್ ಸುರು ಕೆಲೆಂ. ಆಜೂನೀ ತೆಂ ಆಂತೋನಿಕಟ್ಟೆಂತ್ ಮುಂದರುನ್ ಆಸಾಂ. ಸಾಂತ್ ಆಂತೊನಿಕಡೆನ್ ಮಾಗ್‌ಲ್ಲೆ ಉಪ್ಕಾರ್ ದೆವಾಲಾಗಿಂ ವಿನಂತಿ ಕರ್‍ನ್ ಮ್ಹಾಕಾ ಆನಿ ಮ್ಹಜ್ಯಾ ಕುಟ್ಮಾಕ್ ಮಾಗೊನ್ ದಾಡ್‌ಲ್ಲೆ ಆಸಾತ್. ಭಾಯ್ರ್ ಪಡ್‌ಲ್ಲ್ಯೊ ವಸ್ತು ದಾಕವ್ನ್ ದಿಂವ್ವ್ಯಾಂತ್ ಸಾಂತ್ ಆಂತೊನ್ ನಿಸ್ಸೀಮ್. ಘರಾಂತ್ ಮ್ಹಜ್ಯಾ ಯೆಜ್ಮಾನಿಚಿ ಭಾಂಗಾರಾಚಿ ಮುದಿ ಭಾಯ್ರ್ ಪಡ್‌ಲ್ಲಿ, ಕಿತ್ಲೆಂ ಸೊದ್ಲ್ಯಾರೀ ಮೆಳುಂಕ್ ನಾ. ಏಕ್ ವರ್‍ಸ್ ಸಂಪ್ಲೆಂ. ಹಾಂವೆಂ ಸಾಂಗ್ಲೆಂ ‘ಸಾಂತ್ ಆಂತೊನಿ ಲಾಗಿಂ ಮಾಗ್.’ ಎಕಾಚ್ ಹಪ್ತ್ಯಾನ್ ಮುದಿ ವಸ್ತುರಾ ಪಂದಾ ಆಸ್‌ಲ್ಲಿ ಮೆಳ್ಳಿ. ತಾಚ್ಯಾ ಪಯ್ಲೆಂ ಥಂಯ್ ಸೊದ್ಲಾಂ ತರೀ ದಿಸೊಂಕ್ ನಾ.

– ಎವ್ಜಿನ್ ವಾಲ್ಟರ್ ಡಿಸೋಜಾ, ಬಜ್ಪೆ

ಪಾಟ್ಲ್ಯಾ 16 ವರ್‍ಸಾಂ ಥಾವ್ನ್ ಹ್ಯಾ ಥಳಾರ್ ಸಾಂತ್ ಆಂತೊನಿಲಾಗಿಂ ಮಾಗ್‌ಲ್ಲ್ಯಾ ಸಬಾರ್ ಭಕ್ತಿಕಾಂಕ್ ತಾಂಚೆ ಜಿಣ್ಯೆಂತ್ ತಾಚಿಂ ಬರ್ಪೂರ್ ಬೆಸಾಂವಾಂ, ಆಧಾರ್, ಮಜತ್, ಉಪ್ಕಾರ್ ಲಾಬ್ಲ್ಯಾತ್ ಮ್ಹಣ್ ದಯ್ರಾನ್ ಸಾಂಗ್ಯೆತ್. ಭುರ್ಗ್ಯಾಂಕ್ ತಾಂಚ್ಯಾ ಶಿಕ್ಪಾಂತ್ ಸಾಂತ್ ಆಂತೊನ್ ಆಧಾರ್ ಜಾತಾನಾ, ಪಯ್ಣಾರ್‍ಯಾಂಕ್ ತಾಂಚಾ ಪಯ್ಣಾರ್ ರಕ್ಷಣ್, ವ್ಯಾಪರಿಸ್ತಾಂಕ್ ತಾಂಚೊ ವೆಪಾರ್ ಯಶಸ್ವಿ ಜಾಂವ್ಕ್ ಮಜತ್, ವಾವ್ರಾಚ್ಯೆ ಆನಿ ಸೈರಿಕೆಚ್ಯೆ ಸೊದ್ನೆರ್ ಆಸ್‌ಲ್ಲ್ಯಾಂಕ್ ಪಸಂದೆಚಿ ವಿಂಚವ್ಣ್ ಕರುಂಕ್ ಫಾವೊ ಜಾಲಾಂ. ಪಿಡೆಸ್ತಾಂಕ್ ಬರಿ ಭಲಾಯ್ಕಿ, ಭುರ್ಗಿಂ ನಾತ್‌ಲ್ಲ್ಯಾ ಜೊಡ್ಯಾಂಕ್ ಭುರ್ಗ್ಯಾಂಚೆಂ ದೆಣೆಂ, ಉತಾರ್ ಪ್ರಾಯೆಚಾಂಕ್ ಮೊಗಾಚೊ ಸಾಂಗಾತ್ ಮೆಳಾಚೊ ಕರ್‍ನ್, ಜಾಯ್ತ್ಯಾಂಚ್ಯೊ ಭಾಯ್ರ್ ಪಡ್‌ಲ್ಲ್ಯೊ ವಸ್ತು ಮೆಳಾಶ್ಯೊ ಕೆಲ್ಯಾತ್.

ಮುಕ್ಲ್ಯಾ ದಿಸಾಂನಿ ಸಾಂತ್ ಆಂತೊನಿ ಥಂಯ್ ಲೊಕಾಚಿ ಭಕ್ತ್ ಆನಿಕೀ ಭರ್‌ಲ್ಲ್ಯೆ ರಿತಿನ್ ವಾಡೊಂದಿ, ವ್ಹಾಳೊಂದಿ, ವಿಸ್ತಾರುಂದಿ ಆನಿ ತಾಚಿಂ ಆಜಾಪಾಂ, ಮಜತ್, ಕುರ್ಪಾ, ಬೆಸಾಂವಾಂ ಭಕ್ತಿಕಾಂಕ್ ಲಾಬೊಂದಿ ಮ್ಹಣ್ ಮಾಗ್ತಾಂ.

ಕ್ಲಿರ್ಫಡ್ ಡಿ‘ಕೋಸ್ತಾ