ಗೋಲ್ಡನ್ ಚರ್ಚ್ ಡಾಯ್ರಿ
ಅದ್ಯಪಾಡಿ ಸುರ್ವಾತೆಚ್ಯಾ ಕೊಪೆಲ್ ಬಾಂದ್ಪಾಚೆಂ ಕಾಮ್ 1969 ಮೆಯಾಂತ್ ಆರಂಭ್ ಜಾಲ್ಲೆಂ ಆಸೊನ್ ಅಬ್ರಾಹಾಮ್ ಪಿರೇರ್ ಹಾಚೆಂ ಸುಪರ್ವಿಶನ್ ಕರ್ತಾಲೊ.
1972 ಮೇ 21ವೆರ್ ಅದ್ಯಪಾಡಿಚೆಂ ಸುರ್ವಿಲೆಂ ಕೊಪೆಲ್ ಆಶೀರ್ವಚನ್ ಜಾವ್ನ್ ಸುರ್ವಿಲ್ಯಾ ದೊನ್ ವರ್ಸಾಂನಿ ಬಜ್ಪ್ಯಾಂಥಾವ್ನ್ ಯೇವ್ನ್ ಯಾಜಕ್ ಆಯ್ತಾರಾ ಸಾಂಜೆರ್ ಅದ್ಯಪಾಡಿಂತ್ ಮೀಸ್ ಭೆಟಯ್ತಾಲೆ.
ಸುರ್ವಾತೆರ್ ಮಳವೂರು ಗ್ರಾಮಾಂತ್ಲ್ಯಾ ವೆವೆಗ್ಳ್ಯಾ ಜಾಗ್ಯಾಂಕ್ ಲಾಗೊನ್ ನವ್ಯೆ ಫಿರ್ಗಜೆಕ್ 'ಅದ್ಯಪಾಡಿ ಫಿರ್ಗಜ್' ವಾ 'ಕರಂಬಾರ್ ಫಿರ್ಗಜ್' ಮ್ಹಣ್ ನಾಂವ್ ಆಸಾಜೆ ಮಳ್ಳ್ಯೆವಿಶಿಂ ವೆವೆಗ್ಳ್ಳೆ ವಾದ್ ಆಸ್ಲ್ಲ್ಯಾನ್ ತವಳ್ಚೊ ಬಜ್ಪ್ಯಾಂಚೊ ಸಹಾಯಕ್ ಯಾಜಕ್ ಬಾ| ಜೋ ಎಮ್. ಶೆಣಯ್ನ್ ಪಾತ್ರೊನಾಚ್ಯಾ ನಾಂವಾಖಾಲ್ 'ಮರಿಯಪುರ ಫಿರ್ಗಜ್' ಮ್ಹಣ್ ನಾಂವ್ ಸುಚಯ್ಲೆಂ.
ಮಾಂಯ್ ಫಿರ್ಗಜೆಚೊ ಪಾತ್ರೊನ್ ಸಾಂ ಜುಜೆ ದೆಕುನ್ 1974 ಮಾರ್ಚ್ 19ವೆರ್ ಸಾಂ ಜುಜೆಚ್ಯಾ ಫೆಸ್ತಾ ದಿಸಾ ಅದ್ಯಪಾಡಿ ನವಿ ಫಿರ್ಗಜ್ ಮ್ಹಣ್ ಬಿಸ್ಪಾನ್ ಡಿಕ್ರಿ ದಿಲಿ.
14.04.1974ವೆರ್ ಪಾಸ್ಖಾಂಚ್ಯಾ ಆಯ್ತಾರಾ ಆದ್ಯಪಾಡಿಚಿ ಪಯ್ಲಿ ಫಿರ್ಗಜ್ ಗೊವ್ಳಿಕ್ ಪರಿಷದ್ ಅಸ್ಥಿತ್ವಾಕ್ ಆಯ್ಲಿ
21.04.1974ವೆರ್ ಪಯ್ಲಿ ಫಿರ್ಗಜ್ ಸಭಾ ಜಮ್ಲಿ.
ಫಿರ್ಗಜ್ ಸ್ಥಾಪನ್ ಕರ್ತಾನಾ ಸುರ್ವಿಲ್ಯಾ ತೀನ್ ವರ್ಸಾಂಕ್ ಫಿರ್ಗಜೆಚ್ಯಾ ಖರ್ಚಾ ಬಾಬ್ತಿನ್ ಹರ್ ಕುಟ್ಮಾನ್ ಮಹಿನ್ಯಾಕ್ ಏಕ್ ರುಪಯ್ ದಿಂವ್ಚೊ ನಿರ್ಧಾರ್ ಕೆಲೊ.
01.08.1974ವೆರ್ ಆಲ್ತಾರ್ ಭುರ್ಗ್ಯಾಂಚೊ ಸಂಘ್ ಸ್ಥಾಪನ್ ಜಾಲೊ.
29.02.1976ವೆರ್ 50 ವಯ್ರ್ ಸಾಂದೆ ಹಾಜಿರ್ ಜಾಲ್ಲ್ಯಾ ಮರಿಯಪುರ ಫಿರ್ಗಜ್ ಸಭೆಚ್ಯೆ ಜಮಾತೆರ್ ಕರಂಬಾರ್ ವಾಡ್ಯಾಕ್ 'ಫಾತಿಮಾ ವಾಡೊ' ಮ್ಹಣ್ ನಾಂವ್ ದಿಲೆಂ ಆನಿ ಸರ್ವ್ ವಾಡ್ಯಾಂನಿ ಆಪಾಪ್ಲ್ಯಾ ಪಾತ್ರೊನಾಚಿಂ ಫೆಸ್ತಾಂ ಕರ್ಚೊ ನಿರ್ಧಾರ್ ಕೆಲೊ.
02.05.1976ವೆರ್ ಯುವಜಣಾಂಖಾತಿರ್ 'ಮರಿಯಪುರ ಯುವ ಸಂಘಟನ್' ಆನಿ 'ಚಲಿಯಾಂಚಿ ಮರಿಯಾಳ್ ಸೊಡಾಲಿಟಿ' ಸ್ಥಾಪನ್ ಜಾಲಿ.
25.07.1976ವೆರ್ ಅದ್ಯಪಾಡಿಕ್ ಭಿಸ್ಪಾಚಿ ಪಯ್ಲಿ ಗೊವ್ಲಿಕ್ ಭೆಟ್ ಆನಿ 37 ಭುರ್ಗ್ಯಾಂಕ್ ಥಿರಾವ್ಣೆಚೊ ಸಂಸ್ಕಾರ್ ದಿಲೊ.
1977-ಂತ್ ಆದ್ಲ್ಯಾ ಇಗರ್ಜೆ ಸುವಾತೆರ್ ಹರ್ ಕುಟ್ಮಾನ್ ಏಕ್ ಪೊಂಡ್ ಖೊಂಡುನ್ ಮಾಡಾ ಕಾವಾತೊ ದವ್ರುಂಕ್ ನಿರ್ಧಾರ್ ಕೆಲ್ಲೊ ತರ್ ಆದ್ಯಪಾಡಿಂತ್ 2005-ಂತ್ ನವ್ಯೆ ಸುವಾತೆರ್ ಇಗರ್ಜ್ ಜಾಲ್ಲ್ಯಾ ವೆಳಾರ್ಯೀ ಆಸಲೊಚ್ ನಿರ್ಧಾರ್ ಕರುನ್ ಕಾರ್ಯಾಗತ್ ಕೆಲೊ.
ಫಿರ್ಗಜ್ ಫೆಸ್ತ್ ದಶೆಂಬರಾಚ್ಯಾ ದುಸ್ರ್ಯಾ ಹಪ್ತ್ಯಾಂತ್ ಕರುಂಕ್ ನಿರ್ಧಾರ್ ಜಾಲ್ಲೊ ತರ್ಯೀ ವೆಳಾಚ್ಯಾ ಆಭಾವಾನ್ ಪಯ್ಲೆಂ ಫಿರ್ಗಜ್ ಫೆಸ್ತ್ 1978 ಜನೆರ್ 10ವೆರ್ ಆಚರಣ್ ಕರ್ತಾನಾ ಹರ್ ಕುಟ್ಮಾಕ್ ರು. 5ವಂತಿಗೆ ಘಾಲ್ಲಿ.
ನವೆಂ ಎರೋಡ್ರೋಮ್ ಜಾತಾ ಮಣ್ಚ್ಯೆ ಖಬ್ರೆಕ್ ಲಾಗೊನ್ 1978 ಫೆಬ್ರೆರ್ 2ವೆರ್ ಫಿರ್ಗಜ್ ಸಭೆಂತ್ ಇಗರ್ಜ್ ಉರಂವ್ಚ್ಯಾಕ್ ಮನವಿ ದಿಂವ್ಕ್ ನಿರ್ಧಾರ್ ಕೆಲ್ಲೊ.
1980 ಮೆಯಾಂತ್ ಇಗರ್ಜೆ ಮುಕ್ಲೊ ಥೊಡೊ ಜಾಗೊ ಮಾತ್ರ್ ವಿಗಾರಾನ್ ಪಳೆವ್ನ್ ಘೆಂವ್ಚೊ ತರ್ ಹೆರ್ ಸಗ್ಳೊ ಜಾಗೊ ಪಳೆವ್ನ್ ಘೆಂವ್ಚಿ ಜವಾಬ್ದಾರಿ ಉಪಾದ್ಯಕ್ಶ್ ಆನಿ ಆಕ್ಶನ್ ಸಮಿತೆಚ್ಯೆ ತಾಬೆನ್ ದಿಲಿ.
ಲೊಕಾಕ್ ತಪ್ಪಾಲ್ ಸೆವಾ ಮೆಳ್ಚೆಖಾತಿರ್ ಇಗರ್ಜೆ ಕ್ಯಾಂಪಸಾಂತ್ ತಪ್ಪಾಲ್ ದಫ್ತರ್ ಆಸಾ ಕರುಂಕ್ 1981 ಮೆಯಾಂತ್ ನಿರ್ಧಾರ್ ಜಾಲ್ಲೊ. ಪೂಣ್ ತಪ್ಪಾಲ್ ಇಲಾಖ್ಯಾನ್ ಕಾಂಯ್ ಸ್ಪಂದನ್ ದಿನಾತ್ಲ್ಯಾನ್ ಹೆಂ ಯೋಜನ್ ಕಾರ್ಯಗತ್ ಜಾಲೆಂನಾ.
09.05.1982ವೆರ್ 'ಏಕ್ಶನ್ ಸಮಿತೆಚ್ಯಾ' ಮುಖೆಲ್ಪಣಾರ್ ಇಗರ್ಜೆ ಬಾಂದ್ಪಾಚ್ಯಾ ದಶಮಾನೋತ್ಸವಾಸವೆಂ ಖೆಳಾಕೂಟ್ ಆನಿ ಫಿರ್ಗಜ್ ದೀಸ್ ಆಚರಣ್ ಜಾಲೊ ತರ್ ತ್ಯಾಚ್ ಮಹಿನ್ಯಾಚ್ಯಾ ೧೯ವೆರ್ ಪಯ್ಲ್ಯಾ ಫಿರ್ಗಜ್ ವಿಗಾರಾಕ್ ಸರಿಸುಮಾರ್ 100 ಜಣಾಂನಿ ಕೊಳಲ್ಗಿರಿ ಪಾಯ್ಲೆಂ.
ಫಿರ್ಗಜೆಚೆಂ ವ್ಹಡ್ಲೆಂ ಫೆಸ್ತ್ ಕರ್ಚ್ಯಾ ಬದ್ಲಾಕ್ ಸದ್ದ್ಯಾಕ್ ಪಾತ್ರೊನಾಚೆಂ (ತಾರಿಕೆಚೆಂ) ಫೆಸ್ತ್ ಮೆಯಾಂತ್ ಗದ್ದಳಾಯೆನ್ ಕರ್ಯಾಂ ಮ್ಹಳ್ಳೊ ನಿರ್ಧಾರ್ 1984 ಜನೆರಾಂತ್ ಜಾಲೊ. ಪೂಣ್ ಪಾಟ್ಲ್ಯಾ ತೀನ್ ವರ್ಸಾಂನಿ ಫಿರ್ಗಜ್ ಫೆಸ್ತ್ ಜಾಯ್ನಾತ್ಲ್ಲ್ಯಾನ್ 1985-ಂತ್ ಫಿರ್ಗಜ್ ಫೆಸ್ತ್ ಕರುಂಕ್ ನಿರ್ಧಾರ್ ಕೆಲೊ.
1985-ಂತ್ ಪಯ್ಲೆ ಪಾವ್ಟಿಂ ಮೊಂತಿ ಫೆಸ್ತಾ ದಿಸಾ ಫಿರ್ಗಜ್ಗಾರಾಂಕ್ ಖೆಳ್-ಪಂದ್ಯಾಟ್ ಚಲ್ಲೆ ತರ್ ಆಜೂನ್ ತಿ ದಸ್ತುರ್ ಚಾಲ್ತೆರ್ ಆಸಾ.
1985 ನವೆಂಬರಾಂತ್ ತೀನ್ ಕುಟ್ಮಾಂಚ್ಯಾ ಪಿರ್ಜೆಂತಿಂ ಸವೆಂ ವ್ಹಡಾ ಸಂಭ್ರಮಾನ್ ತೀನ್ ದೀಸ್ ಫಿರ್ಗಜ್ ಫೆಸ್ತ್ ಆಚರಣ್ ಜಾಲೆಂ. ನವೆಂಬರ್ 10ವೆರ್ ಆಯ್ತಾರಾ ಸಾಂಜೆರ್ ಕೊಂಪ್ರಿಚೆಂ ಫೆಸ್ತ್ ಆನಿ ಫುರ್ಶಾಂವ್
12ವೆರ್ ಮಂಗ್ಳಾರಾ ಸಾಂಜೆರ್ ಬೆಸ್ಪಾಚೊ ಸಂಭ್ರಮ್
೧೩ವೆರ್ ಸಾಂಜೆರ್ ಭುದ್ವಾರಾ ಫಿರ್ಗಜ್ ಫೆಸ್ತ್.
1985-ಂತ್ 'ಅಂತರಾಶ್ಟ್ರೀಯ್ ಯುವ ವರ್ಸಾ' ಮರಿಯಪುರ ಯುವಕ್ ಸಂಘಾನ್ ಅದ್ಯಪಾಡಿ-ಬಜ್ಪೆ ಮಾರ್ಗಾ ಜಂಕ್ಶನಾರ್ ಬಸ್ಟೋಪ್ ದಾನ್ ದಿಲೆಂ
ಕಾಂಯ್ ಥೊಡಿಂ ವರ್ಸಾಂ ಕುಟ್ಮಾಚೆಂ ಅನ್ವಾಲ್ ದಿನಾತ್ಲ್ಯಾಂಕ್ ಏಕ್ ಪಾವ್ಟಿಂ ಉಗ್ಡಾಸ್ ಕರುನ್ ಉಪ್ರಾಂತ್ ತಾಂಚಿಂ ನಾಂವಾಂ ನೊಟಿಸ್ ಬೊರ್ಡಾರ್ ಘಾಲುಂಕ್ ಗೊವ್ಳಿಕ್ ಪರಿಷದ್ಯೊ ನಿರ್ಧಾರ್ ಕರ್ತಾಲ್ಯೊ. 1975, 1976, 1986-ಂತ್ ಅಸಲೆ ನಿರ್ಧಾರ್ ಕೆಲ್ಲೆ ದಾಕ್ಲೆ ಆಸಾತ್.
1987 'ಆಸ್ರೊ ನಾತ್ಲೆಲ್ಯಾಂಚ್ಯಾ ವರ್ಸಾ' ಕರಂಬಾರಾಂತ್ ಮರಿಯಪುರ ಯುವಕ್ ಸಂಘಾನ್ ಬಸ್ಟೋಪ್ ಬಾಂದುನ್ ದಿಲೆಂ.
1988 ಪರ್ಯಾಂತ್ ಮೂಳ್ ಆದ್ಯಪಾಡಿ ಫಿರ್ಗಜೆಚೊ ಜಾಗೊ ಬಜ್ಪ್ಯಾಂ ಮಾಂಯ್ ಫಿರ್ಗಜೆಚ್ಯಾ ನಾಂವಾರ್ ಆಸ್ಲ್ಲೊ ತೊ ಆದ್ಯಪಾಡಿ ಫಿರ್ಗಜೆಚ್ಯಾ ನಾಂವಾರ್ ನೊಂದಾವಣ್ ಜಾಲೊ.
1988 ಮರಿಯಾಳ್ ವರ್ಸಾಂತ್ಲ್ಯಾ ಮೊಂತಿ ಫೆಸ್ತಾಥಾವ್ನ್ ಹರ್ ವರ್ಸಾ ಮೊಂತಿ ಫೆಸ್ತಾಕ್ ಬ್ಯಾಂಡ್ ಕರ್ಚಿ ದಸ್ತುರ್ ಸುರ್ವಾತ್ ಜಾಲಿ.
1990 ಅಗೋಸ್ತಾಂತ್ ಅದ್ಯಪಾಡಿಂತ್ ವಾಡ್ಯಾ ಜಮಾತಿ ಸುರ್ವಾತ್ ಕರುಂಕ್ ನಿರ್ಧಾರ್ ಜಾಲೊ.
1992 ಅಗೋಸ್ತ್ 27ವೆರ್ ಸಾಂ ಮೊನಿಕಾಚ್ಯಾ ಫೆಸ್ತಾ ದಿಸಾ 'ಕ್ರಿಸ್ತಾಂವ್ ಆವಯಾಂಚಿ ಸೊಡಾಲಿಟಿ' ಸುರ್ವಾತ್ಲಿ.
1992 ನವೆಂಬರಾಂತ್ ಸನ್ವಾರಾ ಸಾಂಜೆಚ್ಯಾ ಮಿಸಾಚ್ಯಾ 15 ಮಿನುಟಾಂ ಪಯ್ಲೆಂ 4.45ಕ್ ನಿತ್ಯಾಧಾರ್ ಮಾಯೆಚೆಂ ನವೆನ್ ಸುರ್ವಾತ್ ಜಾಲೆಂ. ತ್ಯಾಚ್ ವರ್ಸಾ 'ಗಾಯನ್ ಪಂಗಡ್' ವೆವೆಸ್ತಿತ್ ರೂಪ್ ಆಪ್ಣಾಂವ್ಕ್ ಪಾವ್ಲೊ.
1993-ಂತ್ ಸೆಮಿನರಿಥಾವ್ನ್ ಆಯ್ತಾರಾಚೆಂ ಬ್ರದರ್ ಆನಿ ಕೈಕಂಬ ರೋಜಾ ಮಿಸ್ತಿಕಾಥಾವ್ನ್ ಭೆಥನಿ ಧರ್ಮ್ಭಯ್ಣಿಂನಿ ಯೇವ್ನ್ ಗೊವ್ಳಿಕ್ ಸಚೇತನ್ ದಿಲೆಂ.
1993-ಂತ್ ಅದ್ಯಪಾಡಿ ಇಗರ್ಜೆಚ್ಯಾ 5.53 ಎಕ್ರೆ ಜಾಗ್ಯಾಕ್ ಆನಿ ಬಜ್ಪೆ ಇಗರ್ಜೆಚ್ಯಾ ನಾಂವಾರ್ ಆಸ್ಲ್ಲ್ಯಾ ಥೊಡ್ಯಾ ಜಾಗ್ಯಾಕ್ ಲ್ಯಾಂಡ್ ಆಕ್ವಿಜಿಶನ್ ಅಧಿಕಾರಿಂನಿ ಸ್ವಾದೀನ್ ಕರುಂಕ್ ನೊಟಿಸಾಂ ದೀವ್ನ್ ಪರಿಹಾರ್ ಸುಚಿತ್ ಕೆಲ್ಲೆಂ. ಹಾಂತುಂ ಬಾಂದ್ಪಾಂಚೊ ಐವಜ್ ದಾಕವ್ನಾತ್ಲ್ಲೊ ದೆಕುನ್ ಫಿರ್ಗಜ್ಗಾರಾಂನಿ ದಸ್ಕತ್ಯೊ ಜಮವ್ನ್ ಮುಖೆಲ್ ಮಂತ್ರಿಕ್ 'ಮೆಮೊರ್ಯಾಂಡಮ್' ದಾಡ್ಲ್ಲೆಂ.
1995 ಆಗೋಸ್ತ್ 6ವೆರ್ ಪಾಟ್ಲ್ಯಾ 21 ವರ್ಸಾಂಥಾವ್ನ್ ರುಜಾಯ್ ವಾಡ್ಯಾಚೊ ಗುರ್ಕಾರ್ ಜಾವ್ನ್ ಸೆವಾ ದಿಲ್ಲ್ಯಾ ಪಾಸತ್ ಪಾವ್ಲ್ ಆವಿ ಮಸ್ಕರೇನ್ಹಸ್ ಹಾಕಾ ಫಿರ್ಗಜೆ ಹಂತಾರ್ ಸನ್ಮಾನ್ ಪಾಟಯ್ಲೊ.
1997-ಂತ್ ಇಗರ್ಜೆ ಬಾಂದ್ಪಾಚೊ ರುಪ್ಯೋತ್ಸವ್ (1972-1997) ಸಂಭ್ರಮಾನ್ ಆಚರ್ಸಿಲೊ. ಮೇ 4ವೆರ್ ಎವರಿಸ್ತಿಕ್ ಪುರ್ಶಾಂವ್, ಮೇ ೭ವೆರ್ ಭುದ್ವಾರಾ ಸಕಾಳಿಂ ಬಿಸ್ಪಾಚ್ಯಾ ಮುಖೆಲ್ಪಣಾರ್ ಮೊಡ್ಲಾಂಚ್ಯಾ ಮಾಟ್ವಾಂತ್ ಜುಬ್ಲೆವಾಚೆಂ ಮೀಸ್, ವೆದಿ-ಸಾಂಸೃತಿಕ್ ಕಾರ್ಯಿಂ ಆನಿ ಫಿರ್ಗಜ್ಗಾರಾಂನಿ ರಾಂದ್ಲ್ಲೆಂ ಉಂಡ್ಯಾ-ಮಾಸಾಚೆಂ ರುಚಿಕ್ ಜೆವಣ್ ಆನಿ ಸ್ಮಾರಕ್ ಪುಸ್ತಕ್ ಪರ್ಗಟ್ಲೆಂ. ಜುಬ್ಲೆವ್ ವರ್ಸಾ ಮಧೆಂ ಕಾಜಾರಿ ಜೊಡ್ಯಾಂಕ್ ಪಿಕ್ನಿಕ್, ವಾರಾಡ್ಯಾ ಮಟ್ಟಾಚೊ ನಾಟ್ಕುಳೊ ಸ್ಪರ್ಧೊ, ಭುರ್ಗಿಂ-ಯುವಜಣಾಂಕ್ ಖೆಳ್-ಪಂದ್ಯಾಟ್ ಚಲ್ಲೆ.
ವೆವೆಗ್ಳ್ಯಾ ಕಾರಣಾಂಕ್ ಲಾಗೊನ್ ಆನಿ ಪ್ರತ್ಯೇಕ್ ಜಾವ್ನ್ ವಿಮಾನ್ ನಿಲ್ದಾಣಾಚ್ಯಾ ಪ್ರಗತೆಚ್ಯಾ ಕಾರಣಾನ್ 13 ವರ್ಸಾಂ ಉಪ್ರಾಂತ್ 1999 ಫೆಬ್ರೆರ್ ೩ವೆರ್ ಫಿರ್ಗಜ್ ಫೆಸ್ತಾಚೆಂ ಆಚರಣ್ ಜಾಲೆಂ. ತಾಚ್ಯಾ 7 ವರ್ಸಾಂ ಉಪ್ರಾಂತ್ 2006 ಜನೆರ್ 11ವೆರ್ ಫಿರ್ಗಜ್ ಫೆಸ್ತ್ ಆಚರಣ್ ಜಾಲೆಂ.
2002 ಜುಲಾಯ್ 17ವೆರ್ ಸರ್ಕಾರಾನ್ ಅದ್ಯಪಾಡಿ ಗ್ರಾಮಾಂತ್ 2.5 ಎಕ್ರೆ ಜಾಗೊ ಅದ್ಯಪಾಡಿ ಫಿರ್ಗಜೆಕ್ ಮೆಜುನ್ ದಿಲೊ.
ಹ್ಯಾ ಉಪ್ರಾಂತ್ ಇಗರ್ಜೆಚೊ ಜಾಗೊ ವಿಮಾನ್ ನಿಲ್ದಾಣಾಖಾತಿರ್ ವೆತಾ ದೆಕುನ್ 2002 ವರ್ಸಾಚ್ಯಾ ಫಿರ್ಗಜ್ ಫೆಸ್ತಾ ದಿಸಾ ಪುರ್ಶಾಂವ್ ಕಾಡುಂಕ್ ಫಿರ್ಗಜ್ ಸಭೆರ್ ನಿರ್ಧಾರ್ ಜಾಲೊ.
2003 ಎಪ್ರಿಲ್ 22ವೆರ್ ಮಂಗ್ಳುರ್ಚೊ ಬಿಸ್ಪ್ ಅ|ಮಾ|ದೊ| ಲುವಿಸ್ ಪಾವ್ಲ್ ಸೊಜ್ ಹಾಂಣಿ ನವ್ಯಾ ಅದ್ಯಪಾಡಿ ಇಗರ್ಜೆಕ್ ಬುನ್ಯಾದಿ ಫಾತೊರ್ ಆಶೀರ್ವಚನ್ ಕೆಲೊ.
ಮಾಲ್ಘಡ್ಯಾಂಚೆ ಮ್ಹಿನತೆನ್ 1972-ಂತ್ ಬಾಂದ್ಲ್ಲ್ಯಾ ಅದ್ಯಪಾಡಿ ಇಗರ್ಜೆಂತ್ 2003 ಜೂನ್ 6ವೆರ್ ನಿಮಾಣೆಂ ಮೀಸ್ ಭೆಟವ್ನ್ ಫಿರ್ಗಜ್ಗಾರಾಂನಿ ತಾಚೆಂ ಪಾಕೆಂ ಕಾಡ್ನ್ ಹಿ ಸುವಾತ್ ಅಂತರಾಷ್ಟ್ರೀಯ್ ವಿಮಾನ್ ನಿಲ್ದಾಣ್ ಜಾಂವ್ಚ್ಯಾಕ್ ಸೊಡ್ನ್ ದಿಲಿ.
2004 ಮೇ 30ವೆರ್ ಅದ್ಯಪಾಡಿಂತ್ ಮರಿಯಾಳ್ ಗ್ರೊಟ್ಟೊ ಆಶೀರ್ವಚನ್ ಜಾಲೊ.
2005 ಎಪ್ರಿಲ್ 18ವೆರ್ ಮಂಗ್ಳುರ್ಚೊ ಬಿಸ್ಪ್ ಅ|ಮಾ|ದೊ| ಲುವಿಸ್ ಪಾವ್ಲ್ ಸೊಜ್ ಹಾಂಚ್ಯಾ ಹಾತಾಂನಿ ಅದ್ಯಪಾಡಿ ನವ್ಯೆ ಇಗರ್ಜೆಚಿ ಉಗ್ತಾವ್ಣಿ-ಆಶೀರ್ವಚನ್ ಚಲ್ಲೆಂ.
7 ವರ್ಸಾಂ ಉಪ್ರಾಂತ್ 2006 ಜನೆರ್ 11ವೆರ್ ಫಿರ್ಗಜ್ ಫೆಸ್ತ್ ಆಚರಣ್ ಜಾಲೆಂ.
2008 ಮೇ 13ವೆರ್ ಅಂತೋನಿಕಟ್ಟೆ ಸಾಂತ್ ಆಂತೊನಿಚೆಂ ಕೊಪೆಲ್ ಆನಿ ಗ್ರೊಟ್ಟೊಚಿ ಉಗ್ತಾವ್ಣಿ-ಆಶೀರ್ವಚನ್ ಜಾಲೆಂ.
2016 ಜನೆರ್ 26ವೆರ್ ಅದ್ಯಪಾಡಿ ನವ್ಯಾ ಇಗರ್ಜೆ ಬಾಂದ್ಪಾಚ್ಯಾ ದಶಮಾನೋತ್ಸವಾ ಸವೆಂ ನವ್ಯಾ ಹೊಲಾಚೆಂ ಉದ್ಘಾಟನ್ ಚಲ್ಲೆಂ.
2019 ದಶೆಂಬರ್ 21ವೆರ್ ಮಂಗ್ಳುರ್ಚೊ ಬಿಸ್ಪ್ ಅ|ಮಾ|ದೊ| ಪೀಟರ್ ಪಾವ್ಲ್ ಸಲ್ದಾನ್ಹಾ ಹಾಂಚ್ಯಾ ಹಾತಾಂನಿ ಅಂತೋನಿಕಟ್ಟೆ ನವ್ಯೆ ಇಗರ್ಜೆಚಿ ಉಗ್ತಾವ್ಣಿ-ಆಶೀರ್ವಚನ್ ಜಾಲೆಂ.
2023 ಮೇ 21ವೆರ್ ಅದ್ಯಪಾಡಿ-ಅಂತೋನಿಕಟ್ಟೆ ಫಿರ್ಗಜೆಚ್ಯಾ ಭಾಂಗಾರೋತ್ಸವ್ ವರ್ಸಾಕ್ ಅದ್ಯಪಾಡಿಚೆ ಪಯ್ಲೆ ವಿಗಾರ್ ಜಾವ್ನಾಸ್ಲ್ಲ್ಯಾ ಬಾ| ಚಾರ್ಲ್ಸ್ ಲುವಿಸ್ ಹಾಂಣಿ ಚಾಲನ್ ದಿಲೆಂ.