ಅದ್ಯಪಾಡಿ-ಅಂತೋನಿಕಟ್ಟೆ ಫಿರ್ಗಜೆಚಿ ಚರಿತ್ರಾ
ಬಜ್ಪ್ಯಾಂ ಮಾಂಯ್ ಫಿರ್ಗಜೆಥಾವ್ನ್ ಅದ್ಯಪಾಡಿಕ್: ಆತಾಂ ಅಸ್ಚಿ ಅದ್ಯಪಾಡಿ ಮರಿ ಕ್ರಿಸ್ತಾಂವಾಂಚೊ ಆಧಾರ್ ಫಿರ್ಗಜ್ 1974 ಇಸ್ವೆ ಮ್ಹಣಸರ್ ಬಜ್ಪೆ ಫಿರ್ಗಜೆಚೊ ವಾಂಟೊ ಜಾವ್ನಾಸ್ಲ್ಲಿ. ಬಸ್ಸಾಂ-ವಾಹನಾಂ ನಾತ್ಲ್ಲ್ಯಾ ತ್ಯಾ ಕಾಳಾರ್ ಅದ್ಯಪಾಡಿ, ಕೊಳಂಬೆ, ಮರವೂರ್ ಆನಿ ಕೆಂಜಾರ್ ಥಾವ್ನ್ ಪಾಯ್ ವಾಟೆನ್ಂಚ್ ಲೋಕ್ ಬಜ್ಪೆ ಇಗರ್ಜೆಕ್ ವೆತಾಲೊ. 1951 ಇಸ್ವೆಂತ್ ಬಜ್ಪೆಂತ್ ವಿಮಾನ್ ನಿಲ್ದಾಣ್ ಆರಂಭ್ ಜಾಲ್ಲ್ಯಾನ್ ಹಿ ಪಾಂಯ್ ವಾಟ್ ಅನಿಕೀ ಲಾಂಬ್ ಜಾಲಿ.
ಹ್ಯಾ ಲೊಕಾಚೆ ಕಷ್ಟ್ ಸಮ್ಜೊನ್ ಬಜ್ಪೆಚೊ ತವಳ್ಚೊ ವಿಗಾರ್ ಮಾ| ಬಾ| ಅವೆಲಿನ್ ಡಿಸಿಲ್ವಾನ್, ರೂಕ್-ಝಡಾಂ, ಗುಡೆ-ದೊಂಗೊರ್, ನ್ಹಂಯ್ ಆಸೊನ್ ಪ್ರಾಕೃತಿಕ್ ಸೊಭಾಯೆನ್ ಭರ್ಲೆಲ್ಯಾ ಆದ್ಯಪಾಡಿ ಲಾಗ್ಸಾರ್ ಕೊಪೆಲಾ ಖಾತಿರ್ ಜಾಗೊ ಪಳೆಂವ್ಕ್ ಸುರು ಕೆಲೊ. ಬಜ್ಪೆ ಕಾಂಬ್ಳಾಂತ್ಲ್ಯಾ ದೆವಾದಿನ್ ಜೋನ್ ಫ್ರಾನ್ಸಿಸ್ ಫೆರ್ನಾಂಡಿಸಾಚ್ಯೆ ಧುವೆ- ಜಾಂವ್ಯಾನ್ ಶ್ರೀ ಆನಿ ಶ್ರೀಮತಿ ಚಾರ್ಲ್ಸ್ ಆನಿ ಮ್ಯೂರೆಲ್ ಪಿಂಟೊನ್, ಅತಾಂ ಆಸ್ಚ್ಯಾ ರನ್ವೇಚ್ಯಾ ಮದ್ಗಾತ್ ಸುಮಾರ್ 6 ಎಕ್ರೆ ಜಾಗೊ ದಾನ್ ದಿಲೊ. ದಿಯೆಸೆಜಿಚ್ಯಾ ವ್ಹಡಿಲಾಂ ಥಾವ್ನ್ ಪರ್ವಣ್ಗಿ ಘೆವ್ನ್ 28-09-1969 ವೆರ್ ಥಂಯ್ಸರ್ ಕೊಪೆಲಾಕ್ ಬುನ್ಯಾದ್ ಘಾಲಿ.
ಲೊಕಾಚಿ ಖಳ್ಮಿತ್ ನಾತ್ಲ್ಲಿ ವಾಂವ್ಟ್, ಉರ್ಬಾ, ಬರೆಂ ಮನ್ ಆನಿ ಧಾರ್ಮಿಕ್ ವ್ಹಡಿಲಾಂಚ್ಯಾ ಜೊಕ್ತ್ಯಾ ಮಾರ್ಗದರ್ಶನಾನ್, ಹಾತಾಕ್ ಹಾತ್ ಧರುನ್, ಬಜ್ಪೆ ಆನಿ ಅದ್ಯಪಾಡಿ ಗಾಂವ್ಚ್ಯಾ ಮ್ಹಾಲ್ಗಡ್ಯಾಂಚ್ಯಾ ಆನಿ ಯುವಜಣಾಂಚ್ಯಾ ಸಹಕಾರಾನ್, ಗಾಂವ್ಚ್ಯಾ ತಶೆಂಚ್ ಪರ್ಗಾಂವಾಂತ್ಲ್ಯಾಂ ದಾನಿಂಚ್ಯೆ ಕುಮ್ಕೆನ್, ಶ್ರೀ ಆಬ್ರಾಹಾಮ್ ಪಿರೇರಿಚ್ಯಾ ಬಾಂದ್ಪಾ ಕಾಮಾಚ್ಯೆ ಜವಾಬ್ದಾರೆನ್, ಬಜ್ಪೆಚೊ ವಿಗಾರ್ ಬಾ| ಅವೆಲಿನ್ ಸಿಲ್ವಾ, ಸಹಾಯಕ್ ವಿಗಾರ್ ಬಾ| ಜ್ಯೊ ಮೇರಿ ಶೆಣೈ, ಬಾ| ಬರ್ನಾಡ್ ಡಿ’ಸೋಜಾ, ಬಾ| ಇಜಿದೊರ್ ನೊರೊನ್ಹಾ ಆನಿ ಬಾ| ಚಾರ್ಲ್ಸ್ ಲುವಿಸ್ ಹಾಂಚ್ಯಾ ಮುಖೆಲ್ಪಣಾರ್, ಆದ್ಯಪಾಡಿಂತ್ ಕೊಪೆಲ್ ಉಬೆಂ ಜಾಲೆಂ.
ಮರಿ ಕ್ರಿಸ್ತಾಂವಾಂಚೊ ಆಧಾರ್ ಸಾಯ್ಬಿಣಿಕ್ ಸಮರ್ಪುನ್, ಗೊವ್ಳಿ ಬಾಪ್ ಅ| ಮಾ| ದೊ| ಬಾಜಿಲ್ ಸಾಲ್ವದೊರ್ ಸೋಜ್ ಹಾಣಿಂ 21-05-1972 ವೆರ್ ಕೊಪೆಲಾಚೆಂ ಆಶೀರ್ವಚನ್ ಕರ್ನ್ ತೆಂ ಅದ್ಯಪಾಡಿ ಲೊಕಾಖಾತಿರ್ ಅರ್ಪಿಲೆಂ.
ಸ್ವತಂತ್ರ್ ಅದ್ಯಪಾಡಿ ಫಿರ್ಗಜೆಚಿಂ ಸುರ್ವಿಲಿಂ ವರ್ಸಾಂ: ಸುರ್ವಿಲ್ಲ್ಯಾ ದೋನ್ ವರ್ಸಾಂನಿ ಬಜ್ಪ್ಯಾಂ ಥಾವ್ನ್ ಯಾಜಕ್ ಆಯ್ತಾರಾಚೆಂ ಮೀಸ್ ಭೆಟಂವ್ಕ್ ಯೆತಾಲೆ. 1974 ಫೆಬ್ರವರಿ 3 ತಾರಿಕೆರ್ ಆಯ್ತಾರಾ ಬಜ್ಪ್ಯಾಂಚೊ ವಿಗಾರ್ ಬಾ| ನೋರ್ಬಟ್ ಡಿ’ಸೋಜಾ ಹಾಣಿಂ ಜಮಾತ್ ಆಪವ್ನ್ ಬಜ್ಪ್ಯಾಂ ಫಿರ್ಗಜೆ ಥಾವ್ನ್ ಅದ್ಯಪಾಡಿ ಫಿರ್ಗಜ್ ವಿಂಗಡ್ ಕರ್ನ್ ಕಾಯಾಮ್ ವಿಗಾರ್ ನೇಮಕ್ ಕರ್ಚ್ಯಾಕ್ ದಿಯೆಸೆಜಿಕ್ ವಿನಂತಿ ಕೆಲಿ. ಅಶೆಂ 97 ಕುಟ್ಮಾಂ ಆಟಾಪ್ಚೆಂ ಆನಿ ಫಿರ್ಗಜೆಚ್ಯೊ ಗಡಿ ವಿವರ್ಸಿಲ್ಲೆಂ ಡಿಕ್ರಿ ಪತ್ರ್ ಗೊವ್ಳಿಬಾಪಾಂನಿ 19—03-1974 ವೆರ್ ದಿಲೆಂ ಆನಿ ಅದ್ಯಪಾಡಿ ಏಕ್ ಸ್ವತಂತ್ರ್ ಫಿರ್ಗಜ್ ಜಾವ್ನ್ ಆಸ್ತಿತ್ವಾಕ್ ಆಯ್ಲಿ. ತ್ಯಾಚ್ ದೀಸ್ ಆದ್ಯಪಾಡಿ ಫಿರ್ಗಜೆಕ್ ಪಯ್ಲೊ ವಿಗಾರ್ ಜಾವ್ನ್ ಬಾ| ಚಾಲ್ಸ್ ಲುವಿಸ್ ಹ್ಯೆ ಇಗರ್ಜೆಕ್ ಆಯ್ಲೆ.
ಲೊಕಾಚಿಂ ಮನಾಂ ಏಕ್ ಕೆಲ್ಲೆ ಬಾ| ಚಾರ್ಲ್ಸ್ ಲುವಿಸ್, ಬಾಂಯ್ಕ್ ಪಂಪ್ ಸೆಟ್ಚ್ ಘಾಲುಂಕ್, ಕುಟ್ಮಾಕ್ ಎಕಾ ಲೆಕಾನ್ ಮಾಡಾ ಕಾವಾತೊ ಇಗರ್ಜೆಚ್ಯಾ ಹಿತ್ಲಾಂತ್ ಲಾವುನ್, ಇಗರ್ಜೆಚ್ಯಾ ಘರ್ಚ್ಯಾ ಸೊಪ್ಯಾಕ್ ವಣತ್ ಬಾಂದುನ್, ಕಾರಿತಾಸ್ ಸಂಸ್ಥ್ಯಾ ಮುಕಾಂತ್ರ್ ಮೆಳ್ಚ್ಯಾ ಗೊಂವಾದ್ವಾರಿಂ ಗಾಂವ್ಚ್ಯಾ ಸರ್ವ್ ಜಾತಿ ಕಾತಿಂಚ್ಯಾ ದುಬ್ಳ್ಯಾಂಕ್ ಬರೆಪಣ್, ಭುರ್ಗ್ಯಾಂಕ್ ಶಿಂವ್ಣೆಚ್ಯೊ ಕ್ಲಾಸಿ ತಶೆಂಚ್ ಫಿರ್ಗಜ್ ಗೊವ್ಳಿ ಮಂಡಳಿ, ವೆದಿ ಸೆವಕಾಂಚೊ ಮೇಳ್, ಮರಿಯಪುರ ಯುವಕ್ ಸಂಘ್, ಕ್ರಿಸ್ತಾಂವ್ ಆವಯಾಂಚಿ ಸೊಡೆಲಿಟಿ, ಚೆಡ್ವಾಂ ಭುರ್ಗ್ಯಾಂಕ್ ಮರಿಯೆಚೊ ಮೇಳ್, ಎಕಾ ಪಾಟ್ಲ್ಯಾನ್ ಏಕ್ ಸಂಘ್ ಸಂಸ್ಥೆ ಸ್ಥಾಪನ್ ಕೆಲೆ.
ಫಿರ್ಗಜೆಚಿ ವಾಡಾವಳ್ ಆನಿ ಸ್ಥಳಾಂತರಾಚಿ ಭಿರಾಂತ್: 1982 ಥಾವ್ನ್ 1985 ಪರ್ಯಾಂತ್ ದುಸ್ರೊ ವಿಗಾರ್ ಜಾವ್ನ್ ಬಾ| ಕಾಸ್ಮಿರ್ ಮಥಾಯಸ್ ತೀನ್ ವರ್ಸಾಂ ಹ್ಯೆ ಫಿರ್ಗಜೆ ಖಾತಿರ್ ವಾವುರ್ಲೆ. ಘರಾ ಮುಕಾರ್ ಪೊರ್ಟಿಕೊ ಬಾಂದ್ಲೊ ಆನಿ ಸಗ್ಳ್ಯಾ ಕಂಪೌಂಡಾಚಿ ನಿತಳಾಯ್ ತೆಚ್ ಸಾಂಬಾಳ್ತ್ತಾಲೆ. ತಾಂಚ್ಯೆ ಆರ್ಥಿಕ್ ಕುಮ್ಕೆಂ ವರ್ವಿಂ, ಫಿರ್ಗಜೆಚಿಂ ಜಾಯ್ತಿಂ ಕುಟ್ಮಾಂ ಬರ್ಯಾ ಪಾಂವ್ಡ್ಯಾಕ್ ಪಾವ್ಲ್ಯಾಂತ್.
ತಿಸ್ರೊ ವಿಗಾರ್ ಜಾವ್ನ್ ಬಾ| ಸಿಪ್ರಿಯಾನ್ ಲಸ್ರಾದೊ ಹಾಣಿಂ 1985 ಥಾವ್ನ್ 1992 ಪರ್ಯಾಂತ್ ಹ್ಯೆ ಫಿರ್ಗಜೆಂತ್ ಸೆವಾ ದಿಲ್ಯಾ. ಶಿಸ್ತೆಚೊ ಯಾಜಕ್, ನಿತಳಾಯ್ ತಾಂಚ್ಯಾ ಜಿಣಿಯೆಚಿ ಅನ್ಯೇಕ್ ಕೂಸ್, ಗಂಭೀರ್ ಆನಿ ಸುಮಧುರ್ ತಾಳೊ, ಲಿತುರ್ಜಿಕ್ ಸಂಗ್ತಿಂನಿ ಚಡ್ ಮಹತ್ವ್ ದೀವ್ನ್ ಲೊಕಾಚ್ಯಾ ಆತ್ಮಿಕ್ ಗರ್ಜಾಂಕ್ ಪಾವ್ಲೆ.
ಅಂತರಾಷ್ಟ್ರೀಯ್ ಮರಿಯಾಳ್ ವರ್ಸಾಕ್, ಏರ್ಪೋರ್ಟ್ ಗೆಟಿಥಾವ್ನ್ ವಾರಾಡ್ಯಾಚೊ ಪುರ್ಶಾಂವ್, ಇಗರ್ಜೆಕ್ ಆನಿ ಇಗರ್ಜೆಚ್ಯೆ ಅಲ್ತಾರಿಕ್ ಪೇಂಯ್ಟ್, ಯುವಜಣಾಂಕ್ ಪ್ರೋತ್ಸ್ಸಾವ್ ದೀವ್ನ್ ಅದ್ಯಪಾಡಿಂತ್ 1985 ಇಸ್ವೆಂತ್ ಆನಿ ಕರಂಬಾರಾಂತ್ 1987 ಇಸ್ವೆಂತ್ ಬಸ್ಟ್ಯಾಂಡಾಂ ಬಾಂದುನ್ ಲೊಕಾಕ್ ಅರ್ಪಿಲಿಂ. ಆಕೇರಿಚ್ಯಾ ವರ್ಸಾಂನಿ ತಾಂಚಿ ಭಲಾಯ್ಕಿ ಭಿಗಡ್ಲೆಲ್ಯಾ ವೆಳಾರ್, ಥೊಡ್ಯಾ ಮ್ಹಯ್ನ್ಯಾಂಕ್ ಹಾಂಗಾಸರ್ ಬಾ| ಜ್ಯೋ ಮೇರಿ ಶೆಣೈ ಆನಿ ಬಾ| ಲಿಯೊ ಕುಟಿನ್ಹೊ ಹಾಣಿಂ ಸೆವಾ ದಿಲ್ಯಾ.
ಸುಮಾರ್ ವೀಸ್ ವರ್ಸಾಂ ಫಿರ್ಗಜೆಚ್ಯಾ ಸಂಘ್-ಸಂಸ್ಥ್ಯಾಂದ್ವಾರಿಂ, ಲಾಯಿಕ್ ಮುಖೆಲಿ ಆನಿ ಯಾಜಕಾಂಚ್ಯೆ ಮಿನತೆನ್ ಜಾಯ್ತಿ ಧಾರ್ಮಿಕ್ ಆನಿ ಸಾಮಾಜಿಕ್ ಅಭಿವೃದ್ಧಿ ಹಾಂಗಾಸರ್ ಜಾಲ್ಯಾ. ಪೂಣ್ 1989 ಇಸ್ವೆ ಥಾವ್ನ್ಂಚ್ ಹೆಂ ವಿಮಾನ್ ನಿಲ್ದಾಣ್, ಅಂತರಾಷ್ಟ್ರೀಯ್ ವಿಮಾನ್ ನಿಲ್ದಾಣ್ ಜಾವ್ನ್ ಬದ್ಲತೆಲೆಂ ಆನಿ ಅದ್ಯಪಾಡಿ ಇಗರ್ಜ್ ಅನಿ ಜಾಯ್ತಿಂ ಕುಟ್ಮಾಂ ಸ್ಥಳಾಂತರ್ ಜಾತಲಿಂ ಮ್ಹಳ್ಳಿ ಭಿರಾಂತ್ ಲೊಕಾ ಥಂಯ್ ಆಸ್ಲ್ಲಿ ಆನಿ ಖಂಚಿಚ್ ಅಭಿವೃದ್ಧಿ ಕರುಂಕ್ ಲೊಕಾಥಂಯ್ ಭಿರಾಂತ್ ಆನಿ ಕಾವ್ಜೆಣಿ ಸುರು ಜಾಲಿ.
ಸರ್ಕಾರಿ ದಬಾವ್ ಆನಿ ನಿತಿಚೆಂ ಝುಜ್: 1992 ಇಸ್ವೆಂತ್ ಬಾ| ರೊನಾಲ್ಡ್ ಡಿ’ಸೋಜಾ ವಿಗಾರ್ ಜಾವ್ನ್ ಹ್ಯೆ ಫಿರ್ಗಜೆಕ್ ಆಯ್ಲೆ. ಭೊವ್ ಸಾದೆ, ಖಾಲ್ತೆ ಆನಿ ಲೊಕಾಂಚ್ಯಾ ಗರ್ಜಾಂಕ್ ಪಾಂವ್ಚ್ಯಾಂತ್ ತೆ ಸದಾಂಚ್ ಏಕ್ ಮೇಟ್ ಮುಕಾರ್. ಫಿರ್ಗಜ್ ಅಭಿವೃದ್ಧಿ ಕರ್ಚೆಂ ಮನ್ ಆಸ್ಲ್ಲೆಂ ಜಾಲ್ಯಾರೀ ಅಂತರಾಷ್ಟ್ರೀಯ್ ವಿಮಾನ್ ನಿಲ್ದಾಣಾಕ್ ಇಗರ್ಜ್ ಆನಿ ಸಗ್ಳೊ ಜಾಗೊ ಸೊಡ್ನ್ ದೀಜೆ ಮ್ಹಣೊನ್ ಸರ್ಕಾರಾ ಥಾವ್ನ್ ದಬಾವ್ ಯೇವ್ನ್ಚ್ ಆಸ್ಲ್ಲೊ.
ವಿಮಾನ್ ನಿಲ್ದಾಣಾಕ್ ಜಾಗೊ ಸೊಡ್ನ್ ದಿಂವ್ಚ್ಯಾ ನಿರಾಶ್ರಿತ್ ಲೊಕಾಕ್ ಮೆಳ್ಚ್ಯಾ ಸವ್ಲತ್ಯಾಂಕ್ ಆನಿ ಉರುಲ್ಲ್ಯಾ ಲೊಕಾಕ್ ಜಾಂವ್ಚೆ ಸಮಸ್ಯೆ ಸಮ್ಜೊನ್ ಹಿಂದು, ಮುಸ್ಲಿಮ್ ಆನಿ ಕ್ರಿಸ್ತಾಂವ್ ಲೊಕಾಕ್ ಸಾಂಗಾತಾ ಹಾಡುನ್, ವಿವಿಧ್ ಜಾಗ್ಯಾಂನಿ ಪ್ರತಿಭಟನ್ ಕರ್ನ್, ರಾಜಕಿಯ್ ಆನಿ ಸರ್ಕಾರಿ ಅಧಿಕಾರಿಂ ಮುಕಾರ್ ತೆ ಜಾವ್ನ್ ಝುಜೊನ್, ಹೆರಾಂಕ್ ಝುಜೊಂಕ್ ಪ್ರೇರಣ್ ದೀವ್ನ್ ಆಸ್ಲೆ. ತಾಂಚ್ಯಾ ಮುಖೆಲ್ಪಣಾರ್ ಜಾಗೊ ಉರೊಂವ್ಚೆ ಖಾತಿರ್ ಕೆಲ್ಲೆಂ ಹರ್ಯೆಕ್ ಪ್ರಯತ್ನ್ ಸರ್ಕಾರಾಚ್ಯಾ ದೈತ್ಯ್ ಸಕ್ತೆ ಮುಖಾರ್ ನಿರ್ಫಳ್ ಜಾಂವ್ಚಿಂ ಖುಣಾಂ ದಿಸೊನ್ ಯೆತಾನಾ, ಫಿರ್ಗಜೆಚ್ಯಾ ಆನಿ ಸಾಮಾಜಿಕ್ ಮುಖೆಲ್ಯಾಂ ಸಂಗಿಂ ವಾವ್ರುನ್, ಸ್ಥಳಾಂತರ್ ಕರ್ತಾನಾ ಆನಿ ಪರಿಹಾರ್ ದಿತಾನಾ ಜಾಂವ್ಚೊ ಅನ್ಯಾಯ್ ಖಂಡನ್ ಕರ್ನ್ ಲೊಕಾಕ್ ಸಾರ್ಕೊ ಪರಿಹಾರ್ ಆನಿ ಸ್ಥಳಾಂತರಾಕ್ ಜಾಗೊ ಮೆಳ್ಚ್ಯಾ ಬರಿ ವಾವ್ರ್ ಕೆಲೊ.
ಆಜ್ ಅದ್ಯಪಾಡಿ ನವಿ ಇಗರ್ಜ್ ಆಸ್ಚೊ 2.50 ಎಕ್ರೊ ಜಾಗೊ, ಗೋಮಾಳ ಜಾವ್ನ್ ಆಸ್ಲ್ಲೊ. ಹ್ಯಾ ಜಾಗ್ಯಾಚೆಂ ಸುರ್ವಿಲೆಂ ಸರ್ವೆ ಕಾರ್ಯೆಂ ಕರವ್ನ್ ಸರ್ಕಾರಾಚ್ಯಾ ಮುಖಾರ್ ಮನವಿ ಕರ್ನ್ ಗೋಮಾಳ ಮ್ಹಣ್ ಆಸ್ಲ್ಲೊ ಜಾಗೊ ವಿಮಾನ್ ನಿಲ್ದಾಣಾಚ್ಯಾ ಪುನರ್ವಸ್ತೆ ಉದ್ದೇಶಾ ಖಾತಿರ್ ಮ್ಹಣೊನ್ ಸರ್ಕಾರಾಚ್ಯಾ ಕಾರ್ಯದರ್ಶಿ ಮಟ್ಟಾರ್ ಬದ್ಲಾವಣ್ ಕರಂವ್ಚೆಂ ಮಹತ್ವಾಚೆಂ ಕಾಮ್ ತಾಂಚ್ಯಾ ಮುಕೆಲ್ಪಣಾರ್ ಜಾಲ್ಲೆಂ. ತಿತ್ಲೆಂಚ್ ನ್ಹಯ್, ಜೆಜುರಾಯ್ ವಾಡ್ಯಾಚ್ಯಾ ಚಡಾವತ್ ಕುಟ್ಮಾಂಕ್ ಬಜ್ಪೆ ಸೌಹಾರ್ದ ನಗರಾಂತ್ ಪುನರ್ರ್ವಸ್ತಿ ಆನಿ ಥಂಯ್ಸರ್ ಏಕ್ ಕೊಪೆಲಾಕ್ ಸಹಾಯ್ ಧನ್ ಮೆಳ್ಳಾಂ.
ಬಾ| ರೊನಾಲ್ಡ್ ಡಿ’ಸೋಜಾ ಆನಿ ಫಾತಿಮಾ ವಾಡ್ಯಾಚಾ ಶ್ರೀ ಆರ್ಥರ್ ಪಿರೇರಿಚ್ಯಾ ಮುಖೆಲ್ಪಣಾರ್, ಚಡಿತ್ ಪರಿಹಾರ್ ಮೆಳಾಜೆ ಮ್ಹಣ್ ಕೊರ್ಟಾಂತ್ ದಾಖಲ್ ಕೆಲ್ಲ್ಯಾ ದಾವ್ಯಾಂತ್ ಫಿರ್ಗಜೆಕ್ ಆನಿ ಜಾಯ್ತ್ಯಾ ಲೊಕಾಕ್ ಬರೊ ಪರಿಹಾರ್ ಮೆಳ್ಳಾ.
ಬಾ| ರೊನಾಲ್ಡ್ ಡಿ’ಸೋಜಾ ವಿಗಾರ್ ಜಾವ್ನ್ ಆಸ್ಲ್ಲೆ ಅವ್ದೆಂತ್ ವಿಮಾನ್ ನಿಲ್ದಾಣಾಕ್ ಜಾಗೊ ಸ್ವಾಧೀನ್ ಕರ್ಚೆಂ ಸರ್ಕಾರಾಚೆಂ ಕಾಮ್ ಆನಿ ತ್ಯೆ ಸಂಬಂಧಿ ವ್ಹಡ್ ಆಸ್ಲ್ಲೆ ತರೀ ಅದ್ಯಪಾಡಿ ಫಿರ್ಗಜೆಚೊ ರುಪ್ಯೋತ್ಸವ್ ಆನಿ ಮರಿಯಪುರ ಯುವಕ ಸಂಘಾಚೊ ರುಪ್ಯೋತ್ಸವ್ ಕಾರ್ಯಿಂ ಭೋವ್ ಅಪುರ್ಬಾಯೆನ್ ಮಾಂಡುನ್ ಹಾಡ್ಲ್ಲಿಂ. ದೊನೀ ಉತ್ಸವಾಂಕ್ ಫಿರ್ಗಜ್ಗಾರಾನಿ ಸಾಂಗಾತಾ ಮೆಳೊನ್ ಜೆವಣ್ ತಯಾರ್ ಕರ್ನ್ ಆಯಿಲ್ಲ್ಯಾ ಸರ್ವ್ ಸಯ್ರ್ಯಾಂಕ್ ವಾಡ್ಲೆಂ. ಮರಿಯಪುರ ಯುವಕ್ ಸಂಘಾಚ್ಯಾ ರುಪ್ಯೋತ್ಸವ್ ಸಂದರ್ಭಾರ್ ಸಾಮೂಹಿಕ್ ಕಾಜಾರಾಂಚೆಂ ಕಾರ್ಯೆಂ ಮಾಂಡುನ್ ಹಾಡ್ಲ್ಲೆಂ.
ನವಿ ಇಗರ್ಜ್ ಆನಿ ಉಪ್ರಾಂತ್ಲ್ಯೊ ವಾಡಾವಳಿ: ವಿಮಾನ್ ನಿಲ್ದಾಣಾ ಸಂಬಂಧಿ ಚಳ್ವಳ್ ತೀವ್ರ್ ವೆಗಾರ್ ಚಲೊನ್ ಆಸ್ತಾನಾಂಚ್, 1999 ಇಸ್ವೆಂತ್ ಬಾ| ರೊನಾಲ್ಡ್ ಡಿ’ಸೋಜಾ ವರ್ಗ್ ಜಾವ್ನ್ ಗೆಲೆ ಆನಿ ಬಾ| ಜೆರಾಲ್ಡ್ ಫಾನ್ಸಿಸ್ ಪಿಂಟೊ ವಿಗಾರ್ ಜಾವ್ನ್ ಆಯ್ಲೆ. ಏಕ್ ತರ್ನಾಟೊ ಯಾಜಕ್ ಜಾವ್ನ್ ಫಿರ್ಗಜೆಚ್ಯಾ ಕಾಮಾಂತ್ ಧೈರಾಧಿಕ್ ಆನಿ ಬಾರಿಚ್ ಉಮೆದ್ವಂತ್ ಜಾವ್ನಾಸ್ಲ್ಲೆ.
ಇಗರ್ಜೆಚ್ಯಾ ಸ್ಥಳಾಂತರಾಕ್ ವಿಚಾರ್ಲ್ಲ್ಯಾ ಜಾಗ್ಯಾಚೆ ದಾಖ್ಲೆ ಸರ್ಕಾರಾ ಥಾವ್ನ್ ಮೆಳ್ಲ್ಲ್ಯಾ ಶಿವಾಯ್ ಇಗರ್ಜ್ ಮೊಡುಂಕ್ ಸೊಡುಂಕ್ ನಾ. ಆಕ್ರೇಕ್ ಅದ್ಯಪಾಡಿ ಪದ್ವಾರ್ 2.50 ಎಕ್ರೆ ಜಾಗ್ಯಾಚೆ ದಾಖ್ಲೆ ಇಗರ್ಜೆಕ್ ದಿಲ್ಯಾ ಉಪ್ರಾಂತ್, ತ್ಯಾ ಜಾಗ್ಯಾರ್ 22-04-2003 ವೆರ್ ಗೊವ್ಳಿ ಬಾಪ್ ಅ|ಮಾ|ದೊ| ಲುವಿಸ್ ಪಾವ್ಲ್ ಸೊಜಾಂನಿ ಬುನ್ಯಾದಿ ಫಾತರ್ ಘಾಲೊ. 01-06-2003 ವೆರ್ ಇಗರ್ಜ್ ಆನಿ ಸುಮಾರ್ 6 ಎಕ್ರೆ ಜಾಗೊ ಸರ್ಕಾರಾಕ್ ಸೊಡ್ನ್ ದಿಲೊ. ತ್ಯಾಚ್ ದಿಸಾ ಇಗರ್ಜೆಂತ್ ನಿಮಾಣೆಂ ಮೀಸ್ ಭೆಟಯ್ಲೆಂ ಆನಿ ಗರ್ಜೆಚ್ಯೊ ವಸ್ತು ಸುರಕ್ಷಿತ್ ಜಾಗ್ಯಾಕ್ ಸಾಗ್ಶಿಲ್ಯೊ. 08-06-2003 ಥಾವ್ನ್ ಗೊವೊಳಾಂತ್ ಮೀಸ್ ಭೆಟಂವ್ಕ್ ಸುರು ಕೆಲೆಂ. ವಿಗಾರ್ ಬಾ| ಜೆರಾಲ್ಡ್ ಪಿಂಟೊಕ್ ರಾವೊಂಕ್ ಬಿಡಾರ್ ನಾತ್ಲ್ಲ್ಯಾನ್ ಎಕಾ ಬಾಡ್ಯಾಚ್ಯಾ ಘರಾಂತ್ ತೆ ಕಷ್ಟಾಂನಿ ವಸ್ತಿ ಕರ್ನ್ ಆಸ್ಲ್ಲೆ.
ಬಾ| ಜೆರಾಲ್ಡ್ ಫಾನ್ಸಿಸ್ ಪಿಂಟೊಚ್ಯಾ ಮುಖೆಲ್ಪಣಾ ಖಾಲ್, ಗಾಂವ್ಚ್ಯಾ ಲೊಕಾನ್ ಹಾತಾಕ್ ಹಾತ್ ಮೆಳುನ್, ಗಾಂವ್ಚ್ಯಾ ತಶೆಂಚ್ ಪರ್ಗಾಂವಾಂತ್ಲ್ಯಾಂ ದಾನಿಂಚ್ಯಾ ಸಹಕಾರಾನ್ ಅದ್ಯಪಾಡಿಂತ್ ಆತಾಂ ಆಸ್ಚಿ ನವಿ ಇಗರ್ಜ್ ಆನಿ ವಸ್ತೆ ಘರ್ ಉಬೆಂ ಕೆಲೆಂ ಆನಿ 18-04-2005 ವೆರ್ ಗೊವ್ಳಿ ಬಾಪ್ ಅ|ಮಾ|ದೊ| ಲುವಿಸ್ ಪಾವ್ಲ್ ಸೊಜಾಂನಿ ಆರ್ಶೀವಚನ್ ಕೆಲೆಂ.
ಅಂತೋನಿಕಟ್ಟೆಚಿ ಗರ್ಜ್ ಆನಿ ಸಂಬಂದಿತ್ ಸ್ಪಂದನಾಂ: ಪೂಣ್ ಇಗರ್ಜೆಚ್ಯಾ ಬಡ್ಗಾ ಕುಶಿನ್ ಆಸ್ಚ್ಯಾ ವಿಶಾಲ್ ರನ್ವೇನ್ ಬಡ್ಗಾ ಕುಶಿನ್ ಆಸ್ಚ್ಯಾ ಕರಂಬಾರಾಂತ್ಲ್ಯಾ ಫಾತಿಮಾ ವಾಡ್ಯಾಕ್ ವಿಂಗಡ್ ಕೆಲೆಂ. ಫಾತಿಮಾ ವಾಡ್ಯಾಗಾರಾಂನಿ ಇಗರ್ಜೆಕ್ ಯೆಂವ್ಕ್ ಸುಮಾರ್ 8 ಕಿ. ಮೀ. ಪಯ್ಣ್ ಕರಿಜಯ್ ಪಡ್ಲೆಂ ಆನಿ ವಾಹನಾಂಚಿ ಸವ್ಲತಾಯೀ ಏರ್ಪೋರ್ಟಾಚ್ಯಾ ಭಂವ್ತಣಿಂ ನಾ ಜಾಲಿ. ಲೊಕಾಚೆ ಹೆ ಕಷ್ಟ್ ಮತಿಂತ್ ದವರ್ನ್ 2003 ಇಸ್ವೆಂತ್ಚ್ ಕೆಂಜಾರಾಂತ್ ಆಮ್ಚ್ಯಾಚ್ ಕ್ರಿಸ್ತಾಂವ್ ಕುಟ್ಮಾಚಾಂನಿ ಭೊವ್ ಉಣ್ಯೆ ಧರಿಕ್ ಜಾಗೊ ಇಗರ್ಜೆಕ್ ಮ್ಹಣನ್ ದಿಲೊ. 2006 ಇಸ್ವೆಂತ್ ವಿಗಾರ್ ಜಾವ್ನ್ ಆಯಿಲ್ಯಾ ಬಾ| ವರ್ನನ್ ವಾಸಾನ್ ಥಂಯ್ಸರ್ 21-09-2007 ವೆರ್ ಏಕಾ ಕೊಪೆಲಾಕ್ ಬುನ್ಯಾದ್ ಘಾಲ್ನ್ 13-05-2008 ವೆರ್ ಸಾಂತ್ ಅಂತೊನಿಕ್ ಸಮರ್ಪಿಲ್ಲೆಂ ಕೊಪೆಲ್ ಆನಿ ಆಕರ್ಷಿತ್ ಗ್ರೊಟ್ಟೊ ಉಗ್ತಾವಣ್ ಕೆಲೊ.
2008 ಇಸ್ವೆಂತ್ ಬಾ| ಮೆಲ್ವಿನ್ ಡಿ’ಸೋಜಾ ವಿಗಾರ್ ಜಾವ್ನ್ ಆಯ್ಲೆ. ಆಯ್ತಾರಾಚ್ಯಾ ದಿಸಾಂನಿ ಸಕಾಳಿಂ 6.45 ವರಾರ್ ಅಂತೋನಿಕಟ್ಟೆ ಕೊಪೆಲಾಂತ್ ಮಾಗಿರ್ 8.00 ವರಾರ್ ಅದ್ಯಪಾಡಿ ಇಗರ್ಜೆಂತ್ ಮಿಸಾಚೆಂ ಬಲಿದಾನ್ ತೆ ಭೆಟಯ್ತಾಲೆ. ಅದ್ಯಪಾಡಿ ಇಗರ್ಜೆಚ್ಯಾ ಮುಕ್ಲ್ಯಾನ್ ಆನಿ ಕುಶಿನ್ ತಶೆಂಚ್ ಸಿಮಿಸ್ತ್ರೆಕ್ ವೆಚ್ಯೆ ವಾಟೆರ್ ಇಂಟರ್ಲೊಕ್ಸಾಚೆಂ ಕಾಮ್ ತಾಂಚ್ಯಾ ಮುಕೆಲ್ಪಣಾಕಾಲ್ ಜಾಲ್ಲೆಂ.
ಆದ್ಯಪಾಡಿ ಇಗರ್ಜೆಂತ್ ಕಸಲಿಂಯ್ ಕಾರ್ಯಕ್ರಮಾಂ ಮಾಂಡುನ್ ಹಾಡುಂಕ್ ಏಕ್ ಮಿನಿ ಹೊಲ್ ಜಾಯ್ಜಾಯ್ ಮ್ಹಳ್ಳಿ ಲೊಕಾಚಿ ಅಭಿಪ್ರಾಯ್ ಆಸ್ಲ್ಲಿ. ಹೆಂ ಮತಿಂತ್ ದವರುನ್, ಬಾ| ಮೆಲ್ವಿನ್ ಡಿ’ಸೋಜಾ ಕಾಮಾಕ್ ದೆವ್ಲೆ. 01-11-2014 ವೆರ್ ಬುನ್ಯಾದಿ ಫಾತರ್ ಆಶೀರ್ವಾದ್ ಕರುನ್ ಆರಂಭ್ ಕೆಲ್ಲೆಂ ಸಭಾ-ಸಾಲಾಚೆಂ ಕಾಮ್, ಫಿರ್ಗಜೆಚ್ಯಾ ಲೊಕಾನ್ ಹಾತಾಕ್ ಹಾತ್ ಮೆಳುನ್, ಗಾಂವ್ಚ್ಯಾ ತಶೆಂಚ್ ಪರ್ಗಾಂವಾಂತ್ಲ್ಯಾಂ ದಾನಿಂಚ್ಯಾ ಸಹಕಾರಾನ್, ಸರಿಸುಮಾರ್ 15 ಮಹಿನ್ಯಾಂನಿ ಸಂಪ್ಲೆಂ. 26-01-2016 ವೆರ್ ಗೊವ್ಳಿ ಬಾಪ್ ಅ|ಮಾ|ದೊ| ಲುವಿಸ್ ಪಾವ್ಲ್ ಸೊಜಾಂನಿ ಆರ್ಶೀವಚನ್ ಕೆಲೆಂ ಆನಿ ತ್ಯಾ ದೀಸ್ ನವ್ಯಾ ಇಗರ್ಜೆ ಬಾಂದ್ಪಾಚೊ ದಶಮಾನೋತ್ಸವ್ ಆಚರಣ್ ಕೆಲೊ.
2016 ಇಸ್ವೆಂತ್ ಬಾ| ಎಡ್ವಿನ್ ಫ್ರಾನ್ಸಿಸ್ ಪಿಂಟೊ ವಿಗಾರ್ ಜಾವ್ನ್ ಆಯ್ಲೆ. ಅಂತೋನಿಕಟ್ಟೆಚೆಂ ಕೊಪೆಲ್ ಭೊವ್ ಲ್ಹಾನ್ ಆಸ್ಲ್ಲ್ಯಾನ್ 2016 ಇಸ್ವೆಂತ್ ತೆಂ ವಿಸ್ತರಣ್ ಕರ್ಚಿ ಅಲೋಚನ್ ತಾಣಿಂ ಕೆಲಿ. ಅಂತೋನಿಕಟ್ಟೆ ಆಸ್ಪಾಸ್ ಆಸ್ಲ್ಲ್ಯಾ ಲೊಕಾಚ್ಯಾ ಸಹಕಾರಾನ್, ಫಾತಿಮಾ ವಾಡ್ಯಾಗಾರಾಂಚ್ಯೆ ಮಿನತೆನ್ ಆನಿ ಉದಾರ್ ಮನಾಚ್ಯಾ ದಾನಿಂವರ್ವಿಂ, ಸರಿ ಸುಮಾರ್ 3 ವರ್ಸಾಂಚೊ ವಾವ್ರ್ ಸಂಪವ್ನ್ ಆದ್ಲ್ಯಾ ಕೊಪೆಲಾ ವಯ್ರ್ಚ್ ಸಾಂತ್ ಆಂತೊನಿಚಿ ನವಿ ಇಗರ್ಜ್ ಉಬಿ ಕೆಲಿ. ಹಿ ಇಗರ್ಜ್ 21-12-2019 ವೆರ್, ಗೊವ್ಳಿ ಬಾಪ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿಂ ಉಗ್ತಾವಣ್ ಕರ್ನ್ ಆಶೀರ್ವಚನ್ ಕೆಲಿ. ಹಾಚೆ ಸಾಂಗಾತಾ, ಇಗರ್ಜೆ ಮುಕಾರ್ ಇಂಟರ್ಲೊಕ್ಸ್, ಸಿಮಿಸ್ರಿಚೆಂ ಕಂಪೌಂಡ್, ಗ್ರೊಟ್ಟ್ಯಾ ಮುಕಾರ್, ಹೊಲಾ ಮುಕಾರ್ ಅನಿ ಸಿಮಿಸ್ರಿಕ್ ವಚುಂಕ್ ಕಾಂಕ್ರಿಟ್ ಮಾರಗ್, ಆಶೆಂ ಸಭಾರ್ ಅಭಿವೃದ್ಧೆಚಿಂ ಕಾಮಾಂ ತಾಂಚ್ಯಾ ಮುಕೆಲ್ಪಣಾರ್ ಜಾಲ್ಯಾಂತ್.
2022 ಇಸ್ವೆಂತ್ ಬಾ| ಫ್ರಾನ್ಸಿಸ್ ರೊಡ್ರಿಗಸ್ ವಿಗಾರ್ ಜಾವ್ನ್ ಆಯ್ಲೆ. ಏಕ್ ಚತುರ್ ಆನಿ ಉರ್ಬೆವಂತ್ ಯಾಜಕ್ ಜಾವ್ನ್, ತಾಂಚ್ಯಾ ಸಬ್ದಾಂಚ್ಯಾ ಭಂಡಾರಾ ಥಾವ್ನ್ ಮೊವಾಳ್ ಉತ್ರಾಂ ಘೆವ್ನ್ ಲೊಕಾಂಚಿಂ ಮನಾಂ ಜಿಕೊನ್, ದೊನೀ ಕುಶಿಂಚ್ಯಾ ಕುಟ್ಮಾಂಕ್ ಆನಿ ಲೊಕಾಕ್ ಎಕ್ಟಾಂಯ್ ಕರುನ್ ಏಕಾ ಕುಟ್ಮಾಬರಿ ಫಿರ್ಗಜ್ ಸಾಂಬಾಳ್ನ್ ಆಸಾತ್. ದೊ ನೀ ಕುಶಿಂಚ್ಯೊ ಇಗರ್ಜ್ಯೊ ಭೊವ್ ಸಂಪ್ಯೆರಿತಿನ್ ಜಿವಾಳ್ ದವರ್ಲ್ಯಾತ್. ವರ್ಸಾಂತ್ಲ್ತಾ ತಿನೀ ಫೆಸ್ತಾಂಕ್ ಆನಿ ಥೊಡ್ಯಾ ವಿಶೇಸ್ ಸಂದರ್ಭಾಂನಿ, ಎಕಾಚ್ ವೆಳಾರ್ ದೊನೀಕಡೆನ್ ತಾಣಿಂ ಮಿಸಾಂ ಆರಂಭ್ ಕೆಲಿಂ. ಭುರ್ಗ್ಯಾಂಕ್ ವರ್ಸಾಕ್ ಏಕ್ ಶಿಬಿರ್, ಭುರ್ಗ್ಯಾಂಕ್ ಡೇ ಔಟಿಂಗ್, ಯುವಜಣಾಂಕ್ ಉತ್ತೇಜನ್ ಜಾವ್ನ್ ಯುವಜಣಾಂಚೊ ದಿವಸ್, ಅಂತೋನಿಕಟ್ಟೆಂತ್ ಪ್ರತ್ತ್ಯೇಕ್ ಯುವ ಪಂಗಡ್ ‘ಸೈಂಟ್ ಆಂಟನಿ ಯೂತ್’ ಆರಂಭ್ ಕೆಲೊ. ಅಂತೋನಿಕಟ್ಟೆಂತ್, ಮಹಿನ್ಯಾಚ್ಯಾ ಪಯ್ಲ್ಯಾ ಆಯ್ತಾರಾ ಮಿಸಾ ಉಪ್ರಾಂತ್ ಆರಾಧಾನ್, ಜೂನ್ 13 ತಾರಿಕೆರ್ ಸಾಂತ್ ಅಂತೊನಿಚೆಂ ಫೆಸ್ತ್ ಆನಿ ಫೆಬ್ರೆವರಿ 15 ತಾರಿಕೆರ್ ಸಾಂತ್ ಅಂತೊನಿಚ್ಯೆ ರೆಲಿಕೆಚೆಂ ಫೆಸ್ತ್ ಆಚರಣ್ ಕರ್ನ್, ತಶೆಂಚ್ ಹರ್ಯೆಕಾ ಹಾಪ್ತ್ಯಾಚ್ಯಾ ಮಂಗ್ಳಾರಾ ಸಾಂತ್ ಅಂತೊನಿಚ್ಯ್ಯಾ ಮಾನಾಕ್ ಮೀಸ್ ಆನಿ ನೊವೆನ್ ಭೆಟವ್ನ್ ಲೊಕಾಚ್ಯಾ ಆತ್ಮಿಕ್ ಗರ್ಜಾಂಕ್ ತೆ ಪಾವ್ತಾತ್. ಅಂತೋನಿಕಟ್ಟೆಂತ್ ಗ್ರೊಟ್ಟ್ಯಾಚ್ಯಾ ಭೊಂವಾರಿಂ ಆನಿ ವಯ್ಲ್ಯಾ ವಠಾರಾಂತ್ ಇಂಟರ್ಲೊಕ್ಸ್ ಘಾಲ್ನ್ ಕ್ಯಾಂಪಾಸಾಕ್ ಏಕ್ ನವೆಂ ರೂಪ್ ದಿಲಾಂ. ಏಕ್ ನವೆಂ ಟೋಯ್ಲೆಟ್ ಆನಿ ವಾಶ್ ರೂಮ್, ಹೊಲಾಚಿ ಆನಿ ಸಿಮಿಸ್ತ್ರಿಚ್ಯಾ ದೊರ್ಯಾಚಿ ದುರಸ್ತಿ, ಸಿಮಿಸ್ತ್ರಿಚ್ಯಾ ಜಾಗ್ಯಾಚೆಂ ಸೆಟಲ್ಮೆಂಟ್ ಆನಿ ಹೆರ್ ಆತ್ಮಿಕ್ ಬರೆಪಣ್ ಜಾಲಾಂ.
ಅದ್ಯಪಾಡಿ ಫಿರ್ಗಜೆಂತ್ ಸೆವಾ ದಿಲ್ಲೆ ವಿಗಾರ್:
ಫಾ| ಚಾರ್ಲ್ಚ್ ಲುವಿಸ್ – 19.03.1974 ಥಾವ್ನ್ 18.05.1982
ಫಾ| ಕಾಸ್ಮಿರ್ ಮಥಾಯಸ್ – 19.05.1982 ಥಾವ್ನ್ 16.05.1985
ಫಾ| ಸಿಪ್ರಿಯಾನ್ ಲಸ್ರಾದೊ – 17.05.1985 ಥಾವ್ನ್ 04.06.1992
ಫಾ| ರೊನಾಲ್ಡ್ ಡಿ’ಸೋಜ – 05.06.1992 ಥಾವ್ನ್ 03.05.1999
ಫಾ| ಜೆರಾಲ್ಡ್ ಫ್ರಾನ್ಸಿಸ್ ಪಿಂಟೊ – 04.05.1999 ಥಾವ್ನ್ 20.05.2006
ಫಾ| ವರ್ನನ್ ವಾಸ್ – 21.05.2006 ಥಾವ್ನ್ 02.06.2008
ಫಾ| ಮೆಲ್ವಿನ್ ಡಿ’ಸೋಜ – 03.06.2008 ಥಾವ್ನ್ 18.06.2016
ಫಾ| ಎಡ್ವಿನ್ ಫ್ರಾನ್ಸಿಸ್ ಪಿಂಟೊ – 19.06.2016 ಥಾವ್ನ್ 18.05.2022
ಫಾ| ಫ್ರಾನ್ಸಿಸ್ ರೊಡ್ರಿಗಸ್ – 19.05.2022 ಥಾವ್ನ್