ಅಂತೋನಿಕಟ್ಟೆ ಭಕ್ತಿಕ್ ಕೆಂದ್ರಾಚಿ ವಾಡಾವಳ್
ರನ್ವೇ ವರ್ವಿಂ ಪಯ್ಸ್ ಜಾಲ್ಲೊ ವಾಡೊ: ಅದ್ಯಪಾಡಿ ಫಿರ್ಗಜ್ 19-03-1974 ವೆರ್ ಬಜ್ಪೆ ಫಿರ್ಗಜೆಥಾವ್ನ್ ವಿಂಗಡ್ ಜಾವ್ನ್ ಏಕ್ ಸ್ವತಂತ್ರ್ ಫಿರ್ಗಜ್ ಜಾವ್ನ್ ಆಸ್ತಿತ್ವಾಕ್ ಆಯ್ಲಿ. ಬಾ| ಚಾರ್ಲ್ಸ್ ಲುವಿಸ್ ಹ್ಯೆ ಫಿರ್ಗಜೆಚೊ ಪಯ್ಲೊ ವಿಗಾರ್ ಜಾಲೊ. ಹಾಚ್ಯೆ ಉಪ್ರಾಂತ್ ಸುಮಾರ್ ವೀಸ್ ವರ್ಸಾಂ ಫಿರ್ಗಜೆಚ್ಯಾ ಸಂಘ್–ಸಂಸ್ಥಾಂದ್ವಾರಿಂ, ಲಾಯಿಕ್ ಮುಖೆಲಿ ಆನಿ ಯಾಜಕಾಂಚ್ಯೆ ಮಿನತೆನ್ ಜಾಯ್ತಿ ಧಾರ್ಮಿಕ್ ಆನಿ ಸಾಮಾಜಿಕ್ ಅಭಿವೃದ್ಧಿ ಹಾಂಗಾಸರ್ ಜಾಲ್ಯಾ.
ಪೂಣ್ 1989 ಇಸ್ವೆ ಥಾವ್ನ್ಚ್ ಹೆಂ ವಿಮಾನ್ ನಿಲ್ದಾಣ್ ಅಂತರಾಷ್ಟ್ರೀಯ್ ಜಾವ್ನ್ ಬದ್ಲತೆಲೆಂ ಆನಿ ಅದ್ಯಪಾಡಿ ಇಗರ್ಜ್ ಅನಿ ಜಾಯ್ತಿಂ ಕುಟ್ಮಾಂ ಸ್ಥಳಾಂತರ್ ಜಾತಲಿಂ ಮ್ಹಳ್ಳಿ ಭಿರಾಂತ್ ಲೊಕಾ ಥಂಯ್ ಆಸ್ಲ್ಲಿ ಆನಿ ಖಂಚಿಚ್ ಅಭಿವೃದ್ಧಿ ಕರುಂಕ್ ಲೊಕಾಥಂಯ್ ಭಿರಾಂತ್ ಆನಿ ಕಾವ್ಜೆಣಿ ಸುರು ಜಾಲಿ.
ಪೂಣ್ ತವಳ್, ಆತಾಂಚ್ಯಾ ರನ್ವೇರ್ ಆಸ್ಲ್ಲ್ಯಾ ಅದ್ಯಪಾಡಿ ಇಗರ್ಜೆಚ್ಯಾ ಸ್ಥಳಾಂತರಾಕ್ ಅದ್ಯಪಾಡಿ ಪದ್ವಾರ್ 2.5 ಎಕ್ರೊ ಜಾಗೊ ಇಗರ್ಜೆಕ್ ದಿಲ್ಯಾ ಉಪ್ರಾಂತ್ 22-04-2003 ವೆರ್ ಬುನ್ಯಾದಿ ಫಾತರ್ ಘಾಲ್ನ್, 01-06-2003 ವೆರ್ ಅದ್ಯಪಾಡಿಚಿ ಆದ್ಲಿ ಇಗರ್ಜ್ ಆನಿ ಸುಮಾರ್ 6 ಎಕ್ರೆ ಜಾಗೊ ಸರ್ಕಾರಾಕ್ ಸೊಡ್ನ್ ದಿಲೊ. ತ್ಯಾಚ್ ದಿಸಾ ಇಗರ್ಜೆಂತ್ ನಿಮಾಣೆ ಮೀಸ್ ಭೆಟಯ್ಲೆಂ ಆನಿ ಗರ್ಜೆಚ್ಯೊ ವಸ್ತು ಸುರಕ್ಷಿತ್ ಜಾಗ್ಯಾಕ್ ಸಾಗ್ಶಿಲ್ಯೊ. ದುಸ್ರ್ಯಾ ಆಯ್ತಾರಾ ಥಾವ್ನ್, ಅದ್ಯಪಾಡಿ ಪದ್ವಾರ್ ದಿಲ್ಲ್ಯಾ ಜಾಗ್ಯಾರ್ ಗೊವೊಳಾಂತ್ ಮೀಸ್ ಭೆಟಂವ್ಕ್ ಸುರು ಕೆಲೆಂ. ತವಳ್ಚೊ ವಿಗಾರ್ ಬಾ| ಜೆರಾಲ್ಡ್ ಫಾನ್ಸಿಸ್ ಪಿಂಟೊಚ್ಯೆ ಮಿನೆತೆನ್ ಆನಿ ದಾನಿಂಚ್ಯಾ ಆನಿ ಲೊಕಾಚ್ಯಾ ಸಹಕಾರಾನ್ 18-04-2005 ವೆರ್ ಅದ್ಯಪಾಡಿಂತ್ ಆತಾಂ ಆಸ್ಚಿ ನವಿ ಇಗರ್ಜ್ ಸ್ಥಾಪಿತ್ ಜಾಲಿ.
ಪೂಣ್ ಇಗರ್ಜೆಚ್ಯ್ಯೆ ಉಜ್ವ್ಯ್ಯೆ ಕುಶಿನ್ ಆಸ್ಚ್ಯಾ ವಿಶಾಲ್ ರನ್ವೇನ್ ಬಡ್ಗಾ ಕುಶಿನ್ ಆಸ್ಚ್ಯಾ ಕರಂಬಾರಾಂತ್ಲ್ಯಾ ಫಾತಿಮಾ ವಾಡ್ಯಾಕ್ ವಿಂಗಡ್ ಕೆಲೆಂ. ಫಾತಿಮಾ ವಾಡ್ಯಾಗಾರಾಂನಿ ಇಗರ್ಜೆಕ್ ಯೆಂವ್ಕ್ ಸುಮಾರ್ 8 ಕಿ. ಮೀ. ಪಯ್ಣ್ ಕರಿಜಯ್ ಪಡ್ಲೆಂ ಆನಿ ವಾಹನಾಂಚಿ ಸವ್ಲತಾಯೀ ಏರ್ಪೋರ್ಟಾಚ್ಯೆ ಭಂವ್ತಣಿಂ ನಾ ಜಾಲಿ.
ಅಂತೋನಿಕಟ್ಟೆಂತ್ ನವೊ ಜಾಗೊ: ಫಾತಿಮಾ ವಾಡ್ಯಾಚ್ಯಾ ಲೊಕಾಕ್ ಕಷ್ಟ್ ಜಾಲ್ಲೆ ವರ್ವಿಂ, ಗೊವ್ಳಿ ಬಾಪಾಂಕ್ ಮೆಳೊನ್ ಮನವಿ ದಿಲಿ ಆನಿ ಏಕ್ ಪ್ರತ್ಯೇಕ್ ಇಗರ್ಜ್ ಜಾಂವ್ಕ್ ಮನವಿ ದಿಲಿ. ಹ್ಯಾ ಲೊಕಾಚೆ ಕಷ್ಟ್ ಮತಿಂತ್ ದವರ್ನ್ 2003 ಇಸ್ವೆಂತ್ಚ್ ಕೆಂಜಾರಾಂತ್ ಸಬಾರ್ ಕಡೆನ್ ಜಾಗೆ ಪಳೆವ್ನ್, ಗೊವ್ಳಿ ಬಾಪಾಂಚ್ಯಾ ಮುಖೆಲ್ಪಣಾಖಾಲ್, ತೀನ್ ಫಿರ್ಗಜಾಂಚ್ಯಾ ಭಾವಾಡ್ತ್ಯಾಂಕ್ ಸುಲಭ್ ಜಾಂವ್ಚ್ಯಾ ಇರಾದ್ಯಾನ್, ಪೆಜಾರ್ ಫಿರ್ಗಜೆಚ್ಯಾ ದೆವಾಧೀನ್ ದುಮಿಂಗೊ ವೇಗಸ್ ಆನಿ ದೆವಾಧೀನ್ ಮರಿಯಾ ಮಸ್ಕರೇನ್ಹಸ್ ಹಾಂಚ್ಯಾ ಕುಟ್ಮಾಚಿಂ ಮುಖಾರ್ ಯೇವ್ನ್ ಅತ್ಯಂತ್ ಕನಿಸ್ಠ್ ಮೊಲಾಕ್ ಅಂತೋನಿಕಟ್ಟೆಂತ್ ೨೦೦೩ ಇಸ್ವೆಂತ್ಚ್ ದೇವ್ತೆಂಪ್ಲಾ ಖಾತಿರ್ ಜಾಗೊ ದಿಂವ್ಕ್ ಮುಕಾರ್ ಸರ್ಲಿಂ.
ಅಂತೋನಿಕಟ್ಟೆಂತ್ ಕಾಣ್ಘೆಲ್ಲೊ ಜಾಗೊ, ಪೆಜಾರ್ ಫಿರ್ಗಜೆಚ್ಯಾ ನಿತ್ಯಾಧಾರ್ ವಾಡ್ಯಾಚ್ಯೆ ಗಡಿ ಭಿತರ್ ಆಸ್ಲ್ಲ್ಯಾನ್, ಹ್ಯಾ ವಾಡ್ಯಾಚಿಂ ಕುಟ್ಮಾಂ ಭೊವ್ ಸಂತೊಸ್ ಪಾವ್ಲಿಂ. ಕಿತ್ಯಾಕ್ ಮ್ಹಳ್ಯಾರ್ ಹೊ ವಾಡೊ ಪೆಜಾರ್ ಇಗರ್ಜೆ ಥಾವ್ನ್ 8 ಕಿ. ಮೀ. ಪಯ್ಸ್ ಆಸಾ, ಆನಿ ಬಸ್ಸಾಂಚಿ ಸಾರ್ಕಿ ವ್ಯವಸ್ಥಾ ನಾತ್ಲ್ಲ್ಯಾ ಹ್ಯಾ ವಾಡ್ಯಾಚ್ಯಾಂಕ್ ಮಿಸಾಕ್ ವಚುಂಕ್, ಪೆಜಾರ್ ಇಗರ್ಜೆಚ್ಯಾ ಕಾರ್ಯಾಂನಿ ಸಕ್ರಿಯ್ ವಾಂಟೊ ಘೆಂವ್ಕ್ ಕಷ್ಟ್ ಮಾರ್ತಾಲೆ.
11-03-2003 ವೆರ್ ದುಮಿಂಗೊ ವೇಗಸಾಚ್ಯಾ ಕುಟ್ಮಾಚ್ಯಾಂನಿ ದಿಲ್ಲೊ 1 ಎಕ್ರೊ 14 ಸೆಂಟ್ಸ್ ಜಾಗೊ ಇಗರ್ಜೆಕ್ ಸೊಡ್ನ್ ದಿಲೊ. ತಾಣಿಂ ದಿಲ್ಲ್ಯಾ ಜಾಗ್ಯಾ ಪಯ್ಕಿ, 10 ಸೆಂಟ್ಸ್ ತಾಂಚ್ಯಾ ವಾಂಟ್ಯಾಚಿ ಕಾಣಿಕ್ ಜಾವ್ನ್ ಆನಿ 2 ಸೆಂಟ್ಸ್ ಜಾಗೊ ಫುಡೆಂ ಸಂದರ್ಭ್ ಯೆತಾನಾ ತಾಂಚ್ಯಾ ಕುಟ್ಮಾಚಾಂಕ್ ಸಿಮಿಸ್ತ್ರಿಂತ್ ನಿಕೆಪುಂಕ್ ಜಾಗೊ ತಾಣಿಂ ಧರ್ಮಾರ್ಥ್ ದಿಲೊ. ತಶೆಂಚ್, ದೆವಾಧೀನ್ ಮರಿಯಾ ಮಸ್ಕರೇನ್ಹಸ್ ಕುಟ್ಮಾಚ್ಯಾಂನಿ 82 ಸೆಂಟ್ಸ್ ಜಾಗೊ ಇಗರ್ಜೆಕ್ ಸೊಡ್ನ್ ದಿಲೊ ಆನಿ ತಾಣಿಂ ದಿಲ್ಲ್ಯಾ ಜಾಗ್ಯಾ ಪಯ್ಕಿ, 10 ಸೆಂಟ್ಸ್ ತಾಂಚ್ಯಾ ವಾಂಟ್ಯಾಚಿ ಕಾಣಿಕ್ ಜಾವ್ನ್ ಆನಿ 2 ಸೆಂಟ್ಸ್ ಜಾಗೊ ಫುಡೆಂ ಸಂದರ್ಭ್ ಯೆತಾನಾ ತಾಂಚ್ಯಾ ಕುಟ್ಮಾಚಾಂಕ್ ಸಿಮಿಸ್ತ್ರಿಂತ್ ನಿಕೆಪುಂಕ್ ಜಾಗೊ ತಾಣಿಂ ಧರ್ಮಾರ್ಥ್ ದಿಲೊ.
ಅಶೆಂ, 2003 ಇಸ್ವೆಂತ್, ಪೆಜಾರ್ ಫಿರ್ಗಜೆಚೊ ತವಳ್ಚೊ ವಿಗಾರ್ ಬಾ| ಸಿರಿಲ್ ಪಿಂಟೊ ಬಾಪಾಂನಿ ಹೊ ಜಾಗೊ ಬೆಂಜಾರ್ ಕೆಲೊ ಆನಿ ಫಾತಿಮಾ ವಾಡ್ಯಾಚ್ಯಾ ಲೊಕಾಚ್ಯೆ ಮಿನತೆನ್, ಹೊ ಜಾಗೊ ಸಮತಟ್ಟ್ ಕರುನ್, ಸಿಮಿಸ್ತ್ರೆಕ್ ಮ್ಹಣೊನ್ ವಿಂಗಡ್ ಕೆಲ್ಲ್ಯಾ ಜಾಗ್ಯಾಚ್ಯಾ ಪಡ್ಲಾ ಕುಶಿನ್ ದೊರೊ ಬಾಂದುನ್ ಸಿಮಿಸ್ತ್ರ್ ರಚುನ್, ಅದ್ಯಪಾಡಿ ಅದ್ಲ್ಯ್ಯೆ ಸಿಮಿಸ್ತ್ರೆಂತ್ ಆಸ್ಲ್ಲೆ ಫೊಂಡ್ ಹಾಂಗಾಸರ್ ಸ್ಥಳಾಂತರ್ ಕೆಲೆ.
ಅಂತೋನಿಕಟ್ಟೆಂತ್ ಕೊಪೆಲ್ ಆನಿ ಗ್ರೊಟ್ಟೊ: 2003 ಇಸ್ವೆಂತ್ಚ್ ಅಂತೋನಿಕಟ್ಟೆಂತ್ ಜಾಗೊ ಕಾಣ್ಗೆವ್ನ್ ಸಿಮಿಸ್ತ್ರಿಚೆಂ ರಚನ್ ಮಾತ್ರ್ ಕೆಲೆಂ ಶಿವಾಯ್ ಹೆರ್ ಖಂಚ್ಯಾಯೀ ರಿತಿಂಚಿ ಮಾಂಡಾವಳ್ ಘಾಲುಂಕ್ ಗಳಾಯ್ ಜಾಲ್ಲ್ಯಾ ವರ್ವಿಂ, ಫಾತಿಮಾ ವಾಡ್ಯಾಚೊ ಚಡಾವತ್ ಲೋಕ್ ವಿವಿಂಗಡ್ ಜಾಲೊ. ಆಪ್ಲೊ ಆಯ್ತಾರಾಚೊ ಕಾಯ್ದೊ ಪಾಳುಂಕ್ ಅದ್ಯಪಾಡಿ, ಬಜ್ಪೆ ಆನಿ ಹೆರ್ ಇಗರ್ಜಾಂಕ್ ಮಿಸಾಕ್ ವೆತಾಲೊ. ವಾಡ್ಯಾ ಮದ್ಲೊ ಸಂಬಂದ್ ಆನಿ ಫಿರ್ಗಜೆ ಥಂಯ್ ಲೊಕಾಚೆಂ ಮೆತೆರ್ಪಣ್ ಭೊವ್ ಉಣೆ ಜಾವ್ನ್ ಆಯ್ಲೆಂ. ಹ್ಯಾ ಪರಿಸರಾಂತ್ಲೊ ಚಡಾವತ್ ಲೋಕ್ ದುಬ್ಳೊ ಜಾವ್ನಾಸುನ್, ಸರ್ಕಾರಾ ಥಾವ್ನ್ ಮೆಳ್ಲ್ಲ್ಯಾ ಪರಿಹಾರಾನ್ ತೆನ್ಕಾ ಕುಶಿನ್ ಏಕ್ ಇಗರ್ಜ್ ಬಾಂದುಂಕ್ ಆನಿ ಅಂತೋನಿಕಟ್ಟೆಂತ್ ಜಾಗೊ ಕಾಣ್ಘೆಂವ್ಕ್ ಫಾವೊ ಜಾಲಾ ತರೀ, ತಾಚೆ ನಂತರ್ ಕಸಲ್ಯಾಯ್ ಕಾಮಾಂಕ್ ಮುಕಾರ್ ಸರುಂಕ್ ಸಾದ್ಯ್ ಜಾಲೆಂನಾ.
2006 ಇಸ್ವೆಂತ್ ವಿಗಾರ್ ಜಾವ್ನ್ ಆಯಿಲ್ಲ್ಯಾ ಬಾ| ವರ್ನನ್ ವಾಸಾನ್, ಫಾತಿಮಾ ವಾಡ್ಯಾಂತ್ ಜಮಾತ್ ಆಸಾ ಕರ್ನ್, ವಾಡ್ಯಾಚ್ಯಾ ಲೊಕಾಕ್ ಸಾಂಗಾತಾ ಘಾಲ್ನ್, ದಿಯೆಸೆಜಿಚ್ಯಾ ವ್ಹಡಿಲಾಂ ಥಾವ್ನ್ ಪರ್ವಣ್ಗಿ ಘೆವ್ನ್ 21-09-2007ವೆರ್ ಗೊವ್ಳಿ ಬಾಪ್ ಅ|ಮಾ|ದೊ| ಲುವಿಸ್ ಪಾವ್ಲ್ ಸೊಜಾಂನಿ ಅಂತೋನಿಕಟ್ಟೆಂತ್ ಕೊಪೆಲಾಕ್ ಬುನ್ಯಾದಿ ಫಾತರ್ ಘಾಲೊ. ಫಾತಿಮಾ ವಾಡ್ಯಾಗಾರಾಂಚ್ಯೆ ಖಳ್ಮಿತ್ ನಾತ್ಲ್ಲ್ಯೆ ವಾಂವ್ಟಿ ವರ್ವಿಂ, ಹಾತಾಕ್ ಹಾತ್ ಮೆಳುನ್, ದಾನಿಂಚ್ಯೆ ಕುಮ್ಕೆನ್, 13-05-2008 ವೆರ್ ಗೊವ್ಳಿ ಬಾಪ್ ಅ|ಮಾ|ದೊ| ಲುವಿಸ್ ಪಾವ್ಲ್ ಸೊಜಾಂನಿ ಸಾಂತ್ ಅಂತೊನಿಕ್ ಸಮರ್ಪಿಲ್ಲೆಂ ಕೊಪೆಲ್ ಆನಿ ಆಕರ್ಷಿತ್ ಗ್ರೊಟ್ಟೊ ಆರ್ಶೀವಚನ್ ಕರ್ನ್ ಉಗ್ತಾವಣ್ ಕೆಲೊ. ಹ್ಯಾ ಉಗ್ತಾವಣಾ ವೆಳಾರ್, ಪೆಜಾರ್ ಆನಿ ಬಜ್ಪೆ ವಿಗಾರಾಂ ಸಂಗಿಂ, ಪೆಜಾರ್ ನಿತ್ಯಾಧಾರ್ ವಾಡೊ, ಬಜ್ಪೆ ಸಾಂ ತೆರೆಜ್, ಪೊಂಪೈ ಆನಿ ಸಾಂ ಜುವಾಂವ್ ವಾಡ್ಯಾಗಾರಾಂನಿ ಸಕ್ರಿಯ್ ರಿತಿನ್ ತಾಂಚೊ ಸಹಕಾರ್ ದಿಲಾ.
2008 ಇಸ್ವೆ ಥಾವ್ನ್ ಹರ್ ಆಯ್ತಾರಾ ಸಕಾಳಿಂ 6.45 ವರಾರ್ ಮಿಸಾಚೆಂ ಬಲಿದಾನ್, ತಶೆಂಚ್ ಹರ್ಯೇಕ್ ಮಂಗ್ಳಾರಾಚೆಂ ಸಾಂತ್ ಅಂತೊನಿಚೆಂ ನೊವೆನ್ ಆನಿ ಮೀಸ್ ಆರಂಭ್ ಕೆಲೆಂ. ಫಾತಿಮಾ ವಾಡ್ಯಾಚಿಂ ಕೇವಲ್ 30 ಕುಟ್ಮಾಂ ಅಧಿಕೃತ್ ರಿತಿನ್ ಹ್ಯಾ ಕೊಪೆಲಾಂತ್ ಅಸಾತ್ ತರೀ ಪೆಜಾರ್ ನಿತ್ಯಾಧಾರ್ ವಾಡೊ, ಬಜ್ಪೆ ಸಾಂ ತೆರೆಜ್, ಪೊಂಪೈ ಆನಿ ಸಾಂ ಜುವಾಂವ್ ವಾಡ್ಯಾಗಾರಾಂ ಆಯ್ತಾರಾ ಸಕಾಳಿಂ ಆನಿ ಮಂಗ್ಳಾರಾಚೆಂ ಮಿಸಾಂಕ್ ಹಾಂಗಾಸರ್ ಯೆತಾತ್.
ಸಾಂತ್ ಅಂತೊನಿ ಥಂಯ್ ಕ್ರೀಸ್ತೀ ಲೊಕಾಕ್ ಏಕ್ ವಿಶೇಷ್ ರಿತಿಚಿ ಭಕ್ತ್. ಹಾಂಗಾಸರ್ ಸಾಂತ್ ಅಂತೊನಿಚೆಂ ಕೊಪೆಲ್ ಜಾಲ್ಯಾ ಉಪ್ರಾಂತ್ ಆಸ್ಪಾಸ್ಚೊ ಲೋಕ್ ಮಂಗ್ಳಾರಾಚೆಂ ನೊವೆನಾಕ್ ಯೆವ್ನ್ ಭಕ್ತಿನ್ ಯೆವ್ಕರಿಸ್ತಾಚ್ಯಾ ಬಲಿದಾನಾಂತ್ ವಾಂಟೊ ಘೆತಾಲೊ. ಲೊಕಾಕ್ ಸಾಂತ್ ಅಂತೊನಿ ಥಂಯ್ ಭಕ್ತಿಪಣ್ ಚಡತ್ ಆಯ್ಲೆಂ. ಹರ್ಯೇಕಾ ವರ್ಸಾ, ಜೂನ್ 13 ತಾರಿಕೆರ್ ಸಾಂತ್ ಅಂತೊನಿಚಿ ವಾರ್ಷಿಕ್ ಪರಬ್ ಆನಿ ತಾಕಾ ತಯಾರಾಯ್ ಜಾವ್ನ್ ನೋವ್ ದಿಸಾಂಚೆಂ ನೊವೆನ್ ಸುರು ಕೆಲೆಂ. ಹ್ಯಾ ಸಾಂತ್ ಅಂತೊನಿಚ್ಯೆ ವಾರ್ಷಿಕ್ ಪರ್ಬೆಕ್, ಹಾಂಗಾಸರ್ ಸಬಾರ್ ಜಾಗ್ಯಾಂ ಥಾವ್ನ್ ಲೋಕ್ ಯೆವ್ನ್ ಸಾಂತ್ ಅಂತೋನಿಚಿಂ ವಿಷೇಶ್ ಆಶೀರ್ವಾದಾಂ ಜೊಡ್ನ್ ಘೆತಾಲೊ. ದೀಸ್ ವೆತಾಂ ವೆತಾಂ, ಸಾಂತ್ ಅಂತೊನಿ ಥಂಯ್ ಆನಿ ಅಂತೋನಿಕಟ್ಟೆಚ್ಯಾ ಕೊಪೆಲಾ ಥಂಯ್ ಲೊಕಾಚೆಂ ಆಕರ್ಷಣ್ ಚಡುಂಕ್ ಸುರು ಜಾಲೆಂ. ಆಶೆಂ ಆಸ್ತಾಂ, ಹೆಂ ಕೊಪೆಲ್ ಲ್ಹಾನ್ ಜಾಲ್ಲ್ಯಾನ್, ಅಯಿಲ್ಲ್ಯಾ ಲೊಕಾಕ್ ಸುದಾರ್ಸುಂಕ್ ಭೊವ್ ಕಷ್ಟಾಂಚೆಂ ಜಾವ್ನ್ ಅಸಲ್ಲೆಂ.
ಅಂತೋನಿಕಟ್ಟೆಂತ್ ವಿಸ್ತಾರ್ ನವಿ ಇಗರ್ಜ್: 2016 ಇಸ್ವೆಂತ್ ಅದ್ಯಪಾಡಿ ಇಗರ್ಜೆಕ್ ವಿಗಾರ್ ಜಾವ್ನ್ ಆಯಿಲ್ಲ್ಯಾ, ಬಾ| ಎಡ್ವಿನ್ ಫ್ರಾನ್ಸಿಸ್ ಪಿಂಟೊ ಬಾಪಾನ್, ಅಂತೋನಿಕಟ್ಟೆಚೆಂ ಕೊಪೆಲ್ ಭೊವ್ ಲ್ಹಾನ್ ಆಸ್ಲ್ಲ್ಯಾನ್ 2016 ಇಸ್ವೆಂತ್ ತೆಂ ವಿಸ್ತರಣ್ ಕರ್ಚಿ ಅಲೋಚನ್ ಕೆಲಿ. ಅಂತೋನಿಕಟ್ಟೆ ಆಸ್ಪಾಸ್ ಆಸ್ಲ್ಲ್ಯಾ ಲೊಕಾಚ್ಯಾ ಸಹಕಾರಾನ್, ಫಾತಿಮಾ ವಾಡ್ಯಾಗಾರಾಂಚ್ಯೆ ಮಿನತೆನ್ ಆನಿ ಗಾಂವ್ಚ್ಯಾ ತಶೆಂಚ್ ಪರ್ಗಾಂವಾಂತ್ಲ್ಯಾ ಉದಾರ್ ಮನಾಚ್ಯಾ ದಾನಿವರ್ವಿಂ, ಸರಿ ಸುಮಾರ್ ೩ ವರ್ಸಾಂಚೊ ವಾವ್ರ್ ಸಂಪವ್ನ್ ಕೊಪೆಲಾ ವಯ್ರ್ಚ್ ಸಾಂತ್ ಆಂತೊನಿಚಿ ನವಿ ಇಗರ್ಜ್ ಉಬಿ ಕೆಲಿ. ಹಿ ಇಗರ್ಜ್ 21-12-2019 ವೆರ್, ಗೊವ್ಳಿ ಬಾಪ್ ಅ|ಮಾ|ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿಂ ಉಗ್ತಾವಣ್ ಕರ್ನ್ ಆಶೀರ್ವಚನ್ ಕೆಲಿ. ಅದ್ಯಪಾಡಿ ಇಗರ್ಜೆಚ್ಯಾ, ಫಾತಿಮಾ ವಾಡ್ಯಾಚ್ಯಾ ತಶೆಂಚ್ ಬಜ್ಪೆ, ಪೆಜಾರ್ ಆನಿ ಹೆರ್ ಆಸ್ಪಾಸ್ಚ್ಯಾ ಲೊಕಾಂನಿ, ಭೊವ್ ಉಂಚ್ಲ್ಯಾ ರಿತಿನ್, ತಾಂಚಿ ಸೆವಾ ತಾಣಿಂ ಹ್ಯಾ ದೇವ್ ಮಂದಿರಾಕ್ ಅರ್ಪಿಲ್ಯಾ. ಸುಮಾರ್ ಸರ್ತ್ಯೊ ತಾಣಿಂ ಹ್ಯಾ ದೇವ್ ಮಂದಿರಾಖಾತಿರ್ ಕೆಲ್ಯಾತ್ ಆನಿ ತಿ ಮಿನತ್ ಸುಫಳ್ ಜಾಲ್ಯಾ. ಹಾಚೆ ಸಾಂಗಾತಾ, ಇಗರ್ಜೆ ಮುಕಾರ್ ಇಂಟರ್ಲೊಕ್ಸ್, ಸಿಮಿಸ್ರಿಚೆಂ ಕಂಪೌಂಡ್, ಗ್ರೊಟ್ಟ್ಯಾ ಮುಕಾರ್, ಹೊಲಾ ಮುಕಾರ್ ಅನಿ ಸಿಮಿಸ್ತ್ರಿಕ್ ವಚುಂಕ್ ಕಾಂಕ್ರಿಟ್ ಮಾರಗ್, ಆಶೆಂ ಸಭಾರ್ ಅಭಿವೃದ್ಧೆಚಿಂ ಕಾಮಾ ಬಾ| ಎಡ್ವಿನ್ ಫ್ರಾನ್ಸಿಸ್ ಪಿಂಟೊಚ್ಯಾ ಮುಖೆಲ್ಪಣಾರ್ ಜಾಲ್ಯಾಂತ್.
ಇಗರ್ಜೆಚೆಂ ಕಾಮ್ ಜಾಂವ್ಚೆವೆಳಿಂ, ಇಗರ್ಜೆ ಮುಕಾರ್ ಮಾತಿ ಕಾಡ್ತಾನಾ, ಆಜಾಪಿಂ ಥರಾನ್ ಉದಾಕ್ ಮೆಳ್ಳೆಂ ಆನಿ ಹೆಂ ಉದಕ್ ಮೇ ಮಹಿನ್ಯಾಚ್ಯೆ ಆಕೇರ್ ಪರ್ಯಾಂತ್ ಆಸ್ತಾ. ಆಶೆಂ ಸಾಂತ್ ಅಂತೊನಿ ಮರಿಫಾತ್ ಮೆಳ್ಲ್ಲ್ಯಾ ಸಬಾರ್ ಉಪ್ಕಾರಾಂ ವರ್ವಿಂ, ಹೊ ಜಾಗೊ ಸರ್ವ್ ಭಕ್ತಿಕಾಂಕ್ ಆಕರ್ಷಿಕ್ ಜಾಂವ್ಕ್ ಪಾವ್ಲಾ. ಸಾಂತ್ ಅಂತೊನಿಚಿ ಭಕ್ತ್ ಹಾಂಗಾಸರ್ ಚಡತ್ ವೆತಾ. ಸಾಂತ್ ಅಂತೊನಿಚ್ಯಾ ಗ್ರೊಟ್ಟ್ಯಾಕ್ ಸದಾಂನಿತ್ ಲೋಕ್ ಭೆಟ್ ದಿತಾ ಆನಿ ಸಾಂತ್ ಅಂತೊನಿಚಿಂ ವಿಷೇಶ್ ಆಶೀರ್ವಾದಾಂ ಜೊಡ್ನ್ ಘೆತಾತ್.
ಪಾಟ್ಲ್ಯಾ ದೋನ್–ತೀನ್ ವರ್ಸಾಂ ಥಾವ್ನ್ ಸಾಂತ್ ಅಂತೊನಿಚ್ಯಾ ಭೊಂವಾರಿಂ ಆಸ್ಚ್ಯಾ ಪೆಜಾರ್ ಆನಿ ಬಜ್ಪೆಚ್ಯಾ ದೋನ್ ವಾಡ್ಯಾಗಾರಾಂನಿ, ಹಾಂಗಾಸರ್ ಫುಡಾರಾಂತ್ ಫಿರ್ಗಜ್ ಜಾತಾ ಮ್ಹಳ್ಳ್ಯೆ ಪಾತ್ಯೆಣೆನ್ ತಾಂಚ್ಯಾ ಕುಟ್ಮಾಂತ್ ದೆವಾಧಿನ್ ಜಾಲ್ಲ್ಯಾಂಕ್ ಹಾಂಗಾಸರ್ಸ್ ಮಾತ್ಯೆಕ್ ಪಾಯ್ಲಾಂ.
ಸ್ಥಳೀಯ್ ಭಕ್ತಿಕಾಂಥಾವ್ನ್ ಕೊಪೆಲಾಚಿ ಜತನ್: ಅಂತೋನಿಕಟ್ಟೆ ಇಗರ್ಜೆಂತ್ ಯಾಜಕ್ ವಸ್ತಿ ಕರಿನಾತ್ಲೆ ವರ್ವಿಂ, ಫಾತಿಮಾ ವಾಡ್ಯಾ ಸಂಗಿಂ ಹೆರ್ ಆಸ್–ಪಾಸ್ಚೊ ಲೋಕ್, ಎಕಾಮೆಕಾ ಮೆಳೊನ್, ಹರ್ಯೇಕ್ ದಿಸಾ ಇಗರ್ಜ್ ಉಗ್ತೆಂ–ಬಂದ್ ಕರ್ನ್, ಮಿಸಾ ಪಯ್ಲೆಂ, ಜಾಯ್ ಜಾಲ್ಲಿ ಸೆವಾ ಕರ್ನ್ ಆಸಾತ್. ಸಡ್ತಿ ಕರ್ನ್ ಇಗರ್ಜೆಚ್ಯಾ ವಠಾರಾಚೆಂ ನಿರ್ವಹಣ್ ಕರುಂಕ್, ಝಾಡುಂಕ್, ಉದಕ್ ಘಾಲುಂಕ್ ಹಾತಾಕ್ ಹಾತ್ ದಿತಾತ್ ತರ್ ಹರ್ಯೇಕ್ ದೀಸ್ ಇಗರ್ಜೆಚಿ ಭೆಟ್ ಕರ್ನ್ ಇಗರ್ಜೆಚಿ ಭದ್ರತಿ ಆನಿ ಬಂದ್ಬಸ್ತ್ ಪಳೆವ್ನ್ ಕರ್ನ್ ಆಸಾತ್. ಪ್ರತ್ಯೇಕ್ ಜಾವ್ನ್, ಫೆಸ್ತಾಂ ಸಂದರ್ಭಿಂ ಚಡಿತ್ ರಿತಿನ್ ಸಡ್ತಿ ಕರ್ನ್, ಇಗರ್ಜೆ ಥಂಯ್ ಸೆವಾ ದಿತಾತ್.
2020 ಇಸ್ವೆ ಥಾವ್ನ್ ಫೆಬ್ರೆವರಿ 15 ತಾರಿಕೆರ್ ಸಾಂತ್ ಅಂತೊನಿಚ್ಯೆ ರೆಲಿಕೆಚೆಂ ಫೆಸ್ತ್ ಆಚರಣ್ ಕರುಂಕ್ ಆರಂಭ್ ಕೆಲೆಂ. 2022 ಇಸ್ವೆಂತ್ ಬಾ| ಫ್ರಾನ್ಸಿಸ್ ರೊಡ್ರಿಗಸ್ ವಿಗಾರ್ ಜಾವ್ನ್ ಆಯಿಲ್ಲ್ಯಾ ಉಪ್ರಾಂತ್ ಅಂತೋನಿಕಟ್ಟೆಂತ್ ವರ್ಸಾಂಚ್ಯಾ ತೀನೀ ಫೆಸ್ತಾಂಕ್ (ಕ್ರಿಸ್ಮಸ್, ಮೊಂತಿಫೆಸ್ತ್, ಆನಿ ಪಾಸ್ಖಾಂಚೆಂ ಫೆಸ್ತ್) ಆನಿ ಥೊಡ್ಯಾ ವಿಶೇಸ್ ಸಂದರ್ಭಾಂನಿ ತಾಣಿಂ ಮಿಸಾಂ ಆರಂಭ್ ಕೆಲಿಂ. ಅಂತೋನಿಕಟ್ಟೆಂತ್, ಮಹಿನ್ಯಾಚ್ಯಾ ಪಯ್ಲ್ಯಾ ಆಯ್ತಾರಾ ಮಿಸಾ ಉಪ್ರಾಂತ್ ಆರಾಧಾನ್ ಸುರು ಕರ್ನ್ ಲೊಕಾಚ್ಯಾ ಆತ್ಮಿಕ್ ಗರ್ಜಾಂಕ್ ಪಾವ್ತಾತ್. ಯುವಜಣಾಂಕ್ ಉತ್ತೇಜನ್ ಜಾವ್ನ್ ಅಂತೋನಿಕಟ್ಟೆಂತ್ ಪ್ರತ್ತ್ಯೇಕ್ ಯುವ ಪಂಗಡ್ ‘ಸೈಂಟ್ ಆಂಟನಿ ಯೂತ್‘ ಆರಂಭ್ ಕೆಲೊ. ಅಂತೋನಿಕಟ್ಟೆಂತ್ ಗ್ರೊಟ್ಟ್ಯಾಚ್ಯಾ ಭೊಂವಾರಿಂ ಆನಿ ವಯ್ಲ್ಯಾ ವಠಾರಾಂತ್ ಇಂಟರ್ಲೋಕ್ ಘಾಲ್ನ್ ಕ್ಯಾಂಪಸಾಕ್ ಏಕ್ ನವೆಂ ರೂಪ್ ದಿಲಾಂ. ಏಕ್ ನವೆಂ ಟೋಯ್ಲೆಟ್ ಆನಿ ವಾಶ್ ರೂಮ್, ಹೊಲಾಚಿ ಆನಿ ಸಿಮಿಸ್ತ್ರಿಚ್ಯಾ ದೊರ್ಯಾಚಿ ದುರಸ್ತಿ, ಸಿಮಿಸ್ತ್ರಿಚ್ಯಾ ಜಾಗ್ಯಾಚೆಂ ಸೆಟಲ್ಮೆಂಟ್ ಆನಿ ಹೆರ್ ಆತ್ಮಿಕ್ ಬರೆಪಣ್ ಜಾಲಾಂ.
ಪ್ರಸ್ತುತ್ ಹರ್ಯೇಕ್ ಮಂಗ್ಳಾರಾಚೆಂ ಸಾಂತ್ ಅಂತೊನಿಚೆಂ ನೊವೆನ್ ಆನಿ ಮೀಸ್ ಆಸಾ. ತಶೆಂಚ್ ಹರ್ಯೇಕಾ ವರ್ಸಾಂ, ಜೂನ್ 13 ತಾರಿಕೆರ್ ಸಾಂತ್ ಅಂತೊನಿಚೆಂ ಫೆಸ್ತ್ ಆನಿ ಫೆಬ್ರೆವರಿ 15 ತಾರಿಕೆರ್ ಸಾಂತ್ ಅಂತೊನಿಚ್ಯೆ ರೆಲಿಕೆಚೆಂ ಫೆಸ್ತ್ ಆಚರಣ್ ಕರ್ತಾಂವ್ ಆನಿ ತಯಾರಾಯ್ ಜಾವ್ನ್ ತ್ರಿದುಮ್ ಆಸಾ. ದೊನೀ ಫೆಸ್ತಾಂಕ್ ಆನಿ ತ್ರಿದುಮಾಂಕ್ ಆಯಿಲ್ಲ್ಯಾ ಲೊಕಾಕ್ ಸಾಂಜೆಚ್ಯಾ ಜೆವ್ಣಾಚಿ ಮಾಂಡಾವಳ್ ಆಸಾ. ಆಯ್ಲೆವಾರ್ ಅಂತೊನಿಚ್ಯೆ ಪರ್ಭೆಕ್, ಹಾಂಗಾಸರ್ ಯೆಂವ್ಚ್ಯಾ ಭಕ್ತಿಕಾಂಚೊ ಸಂಖೊ ಚಡತ್ ಆಸಾ. ದೀಸ್ ವೆತಾ ವೆತಾ, ಸಾಂತ್ ಅಂತೊನಿ ಥಂಯ್ ಆನಿ ಅಂತೋನಿಕಟ್ಟೆಚ್ಯೆ ಇUರ್ಜೆ ಥಂಯ್ ಲೊಕಾಚೆಂ ಆಕರ್ಷಣ್ ಚಡುನ್ ಆಸಾ. ಹಿ ಲೊಕಾಚಿ ಭಕ್ತ್ ಅನಿಕೀ ವಾಡೊಂದಿ. ತಶೆಂಚ್ ಹೆಂ ಏಕ್ ಪೂಣ್ಶೆತ್, ತಶೆಂಚ್ ಭೊಂವಾರಿಂ ಆಸ್ಚ್ಯಾ ಸರ್ವ್ ಕುಟ್ಮಾಂಕ್ ಏಕ್ ಫಿರ್ಗಜ್ ಜಾತೆಲಿ ಮ್ಹಣ್ ಆಮ್ಚಿ ಪಾತ್ಯೆಣಿ.
‘ಆಂತೋನಿಕಟ್ಟೆ‘ ನಾಂವಾ ಪಾಟ್ಲಿ ಚರಿತ್ರಾ
ಸಾಂತ್ ಅಂತೊನಿಚಿ ಇಗರ್ಜ್, ಅಂತೋನಿಕಟ್ಟೆ ಮ್ಹಣ್ತಾನಾ ಹೆಂ ನಾಂವ್ ಕೊಪೆಲ್ ಸುರ್ವಾತ್ ಕರ್ತಾನಾ ಕೊಪೆಲಾಕ್ ದವರ್ಲ್ಲ್ಯಾನ್, ‘ಆಂತೋನಿಕಟ್ಟೆ‘ ನಾಂವ್ ಜಾಗ್ಯಾಕ್ ಆಯ್ಲೆಂ ಮ್ಹಣ್ ಚಿಂತ್ಚೆಂ ಸ್ವಾಭಾವಿಕ್. ಪೂಣ್ ತಶೆಂ ನ್ಹಯ್. . ! ಹೆಂ ಏಕ್ ವ್ಯಕ್ತಿಚೆಂ ನಾಂವ್ ಪಯ್ಲೆಂ ಜಾಗ್ಯಾಕ್ ಪಡೊನ್ ಉಪ್ರಾಂತ್ ಕೊಪೆಲಾಕ್ ದವರ್ಲ್ಲೆಂ.
ಕೆಂಜಾರ್ ಲಾಗಿಂ ಆಸ್ಚ್ಯಾ ಬಜ್ಪೆ ಫಿರ್ಗಜೆಚ್ಯಾ ಸಾಂ ತೆರೆಜ್ ವಾಡ್ಯಾಂತ್ಲೊ ದೆವಾದಿನ್ ವಿಲ್ಯಮ್ ಪಿಂಟೊ, ಸಾಂತ್ ಆಂತೊನಿಚ್ಯಾ ಆಸ್ರ್ಯಾಂತ್ ಜಲ್ಮೊನ್ ವಾಡ್ಲ್ಲ್ಯಾ ಮಾಗ್ದಲೆನ್ ಪಿಂಟೊಲಾಗಿಂ 05-05-1962 ವೆರ್ ಲಗ್ನ್ ಜಾಲೊ. ಹ್ಯಾ ಜೊಡ್ಯಾಕ್ ತೆಗಾಂ ಜಣಾಂ ಭುರ್ಗಿಂ –ಮಾಲ್ಘಡೊ ಆಂಟನಿ, ಶೋಭಾ ಆನಿ ಡೋನಿ. 08-09-1964ವೆರ್ ಆಂಟನಿ ಜಲ್ಮಾಲೊ ಆನಿ ತ್ಯೆ ಆವಯ್ನ್ ಸಾಂತ್ ಆಂತೊನಿಕ್ ಉಪ್ಕಾರಿ ಮನಾನ್ ಆಪ್ಲ್ಯಾ ಪಯ್ಲ್ಯಾ ಬಾಳಾಕ್ ಅಂತೊನಿ ಮ್ಹಣ್ಚ್ ನಾಂವ್ ದವರ್ಲೆಂ. ಆಂತೊನಿ ವಾಡ್ಲೊ ಆನಿ ಕೆಂಜಾರ್ ಲಾಗಿಂ ಜಿಯೆವ್ನ್ ಬಸ್ಸ್ ನಿರ್ವಾಹಕ್ ಜಾವ್ನ್ ವಾವ್ರ್ ಕರ್ತ್ತಾಲೊ. ಏಕ್ ಕಾಟ್ಯಾಬರಿ ಆಸ್ಲ್ಲ್ಯೆ ಸುವಾತೆರ್ ತೊ ಕೆದಾಳಾಯ್ ಬಸ್ಸಾಂಕ್ ರಾಕೊನ್ ಆಸ್ತಾಲೊ ದೆಕುನ್, ಉರುಲ್ಲ್ಯಾ ಬಸ್ಸಾಂಚ್ಯಾ ನಿರ್ವಹಕಾಂನಿ ತ್ಯೆ ಸುವಾತೆಕ್ ‘ಆಂತೋನಿಕಟ್ಟೆ‘ ಮ್ಹಣ್ ಆಪಂವ್ಕ್ ಸುರು ಕೆಲೆಂ, ಆನಿ ತೆಂ ನಾಂವ್ ಪ್ರಸಿದ್ದ್ ಜಾಲೆಂ. ಪುಡೆಂ 2005 ಇಸ್ವೆಂತ್ ಹ್ಯಾ ಜಾಗ್ಯಾ ಲಾಗ್ಸಾರ್ಚ್ ಕೊಪೆಲ್ ಬಾಂದ್ಚೊ ಅವ್ಕಾಸ್ ಉದೆತಾನಾ, ಯೆದೊಳ್ಚ್ ಪ್ರಚಲಿತ್ ಆಸ್ಚ್ಯಾ ಆಂತೋನಿಕಟ್ಟೆ ಜಾಗ್ಯಾರ್ ಸಾಂತ್ ಅಂತೊನಿಕ್ ಸಮರ್ಪಿಲ್ಲಿ ಇಗರ್ಜ್ ಬಾಂದ್ಚಿ ಮ್ಹಣ್ ನಿರ್ಧಾರ್ ಜಾಲೊ. 2005 ಇಸ್ವೆಂತ್ ವಾಯ್ಲೆಟ್ ಪಿಂಟೊಲಾಗಿಂ ಲಗ್ನ್ ಜಾಲ್ಲ್ಯಾ ಹ್ಯಾ ಆಂತೊನಿಕ್, ಅಶ್ವಿತಾ ಆನಿ ಆನ್ವಿತಾ ಮ್ಹಳ್ಳಿಂ ದೊಗಾಂ ಭುರ್ಗಿಂ ಆಸಾತ್. ದುರಾದೃಷ್ಟ್ವಶಾತ್ 2016 ಇಸ್ವೆಂತ್ ಹೊ ವ್ಯಕ್ತಿ ದೆವಾದಿನ್ ಜಾಲೊ. ಹ್ಯಾ ಸಾದ್ಯಾ ಮನ್ಶಾಕ್ ಆಮಿ ಮಾನ್ ಬಾಗಾಯ್ತಾಂವ್ ಆನಿ ಸಾಸ್ಣಾಚೊ ವಿಶೆವ್ ಮಾಗ್ತಾಂವ್.