ಕಾಪ್ಯೆ ರಂಗಾಚಿಂ ಸಿಸ್ಟ್ರಾಂ

ಪಾಟ್ಲ್ಯಾ 8 ವರ್‍ಸಾಂಥಾವ್ನ್ ಬಜ್ಪ್ಯಾಂ ಸಾಂ ಜುವಾಂವ್ ಪಾವ್ಲ್ ದುಸ್ರ್ಯಾಚ್ಯಾ ಪೂಣ್‌ಶೆತಾಂತ್ ಹಪ್ತ್ಯಾಚ್ಯಾ ಹರ್‍ಯೆಕಾ ದಿಸಾ ಸಕಾಳಿಂ ಥಾವ್ನ್ ಸಾಂಜ್ ಪರ್ಯಾಂತ್ ಆಸ್ಚಿಂ ಆನಿ ಭಕ್ತಿಕಾಂಕ್ ಮೆಳ್ಚಿಂ ಕಾಪ್ಯೆ ರಂಗಾಚ್ಯಾ ಲೊಬಾಚಿಂ ಧರ್ಮ್ ಭಯ್ಣಿಂ ಆಸಾತ್. ‘ಕ್ರಿಸ್ತಾಚ್ಯೊ ಮಿಶನರಿ ಧರ್ಮ್‌ಭಯ್ಣಿಂ’ ವಾ ‘ಮಿಶನರಿ ಸಿಸ್ಟರ್ಸ್ ಒಫ್ ಜೀಸಸ್’ ನಾಂವಾಚೊ ಹೊ ಧಾರ್ಮಿಕ್ ಮೇಳ್ ಆಯ್ಲೆವಾರ್ 1989-ತ್ ಸ್ಥಾಪನ್ ಜಾಲ್ಲೊ. ಭೊವ್ ಆರ್ವಿಲೊ ಮೇಳ್ ಆನಿ ಪವಿತ್ರ್ ಸಭೆಂತ್ ತಾಂಚೆ ಸಾಂದೆ ಉಣೆ ತರ್‌ಯೀ ಬಜ್ಪ್ಯಾಂ ಆನಿ ಭೊಂವಾರಿಂ ತಾಂಚಿ ಹಾಜ್ರಿ ಆನಿ ಮಿಸಾಂವಾನ್ ಛಾಪ್ ಮಾರುನ್ ಲೊಕಾ ಮನಾಂನಿ ರೊಂಬ್ಲಾ. ಪಾಟ್ಲ್ಯಾ 8 ವರ್‍ಸಾಂಥಾವ್ನ್ ತಿಂ ಆಯ್ತಾರಾಚೆಂ ಆನಿ ಫೆಸ್ತಾಂವೆಳಿಂ ಅಂತೋನಿಕಟ್ಟೆಂತ್ ತಾಂಚೊ ಗೊವ್ಳಿಕ್ ವಾವ್ರ್ ದಿತಾತ್ ತರ್ ಆಯ್ಲೆವಾರ್ ಅದ್ಯಪಾಡಿಕ್‌ಯಿ ತೊ ವಿಸ್ತಾರ್‍ಲಾ.

ಬಜ್ಪ್ಯಾಂಗಾರ್ನಿಥಾವ್ನ್ ಸ್ಥಾಪನ್:

ಉಲ್ಲೇಕಿತ್ ಮೆಳಾಚಿ ಸ್ಥಾಪಕಿ ಸಿಸ್ಟರ್ (ಮದರ್) ಸೆಲಿನ್ ಕುಟಿನ್ಹಾ ಮುಳಾನ್ ಬಜ್ಪ್ಯಾಂಗಾರ್ನ್. ಪ್ರಸ್ತುತ್ ತಿ ಮುಂಬಯಿಚ್ಯಾ ವಸಯ್ ದಿಯೆಸೆಜಿಚ್ಯಾ ನಾಳಸೊಪಾರಾಂತ್ ಆಸೊನ್ ಗೊವ್ಳಿಕ್ ಗರ್ಜ್ ಆಸ್ಚೆಕಡೆನ್ ಆಪ್ಲ್ಯಾ ಥೊಡ್ಯಾಚ್ ಧರ್ಮ್ ಭಯ್ಣಿಂಕ್ ದಾಡ್ನ್ ವೆವೆಗ್ಳಿಂ ಸಚೇತನಾಂ ದಿಂವ್ಚ್ಯಾಂತ್ ವೆಸ್ತ್ ಆಸಾ. ೮ ಕೊವೆಂತಾಂ ಆಸ್ಚ್ಯಾ ಪ್ರಸ್ತುತ್ ಪರಿಗತೆಂತ್ ತಿಚ್ ಮೆಳಾಚಿ ಸ್ಥಾಪಕಿ, ಪ್ರ್ಯಾಂತೀಯ್ ವ್ಹಡಿಲ್ನ್ ಆನಿ ಮ್ಹಾ-ವ್ಹಡಿಲ್ನ್ ವಾ ಜೆನ್‌ರಲ್.

ಕಾಪ್ಯೆ ರಂಗಾಚೆಂ ಮಿಸಾಂವ್:

ಚಡ್‌ಶ್ಯಾನ್ ಫ್ರಾನ್ಸಿಸ್ಕನ್ ಮೆಳಾಂನಿ ಆಪ್ಲ್ಯಾ ಧಾರ್ಮಿಕ್ ನ್ಹೆಸ್ಣಾಕ್ ವಾಪರ್‍ಚೊ ಕಾಪ್ಯೆ ರಂಗ್ ಪ್ರಾಚಿತ್, ಜಿಣಿ ಬದ್ಲಾಪ್ ಆನಿ ನವ್ಯೆ ಜಿಣ್ಯೆಚೊ ಸಂಕೇತ್. ಪೆಂಕ್ಟಾ ಭೊವಾಂರಿಂ ಬಾಂದ್ಚೆ ಧವೆ ನಾಡೆ ವಾ ‘ಸಿಂಕ್ಚರ್’ ಆಪುಣ್ ಕ್ರಿಸ್ತಾಕ್ ನ್ಹೆಸ್ಲ್ಯಾಂತ್ ಮ್ಹಣ್ ಪರ್ಗಟ್ತಾ. ಹ್ಯೊ ಧರ್ಮ್ ಭಯ್ಣಿಂ ಅಪ್ಲ್ಯಾ ನ್ಹ್ಹೆಸ್ಣಾಂತ್ ಹೊ ರಂಗ್ ಆನಿ ನಾಡೆ ವಾಪರ್‍ತಾತ್. ಹ್ಯಾ ಮೆಳಾಚೆಂ ಕುರ್ಪೆದೆಣೆಂ ವಾ ‘ಕ್ಯಾರಿಜಮ್’ ಕ್ಯಾರಿಸ್‌ಮ್ಯಾಟಿಕ್ ಜಿನೊಸಾನ್ ಸುವಾರ್ತಾ ಪ್ರಸಾರ್ ಕರ್‍ಚಿ. ಸಾಂಗಾತಾಚ್ ದೆವಾಚೆಂ ಉತರ್ ಪರ್ಗಟ್ಚೆಂ, ಕೌನ್ಸಿಲಿಂಗ್, ಮಾಗ್ಣ್ಯಾವಿಧಿ, ಕ್ರಿಸ್ತೀ ಶಿಕ್ಶಣ್ ಇತ್ಯಾದಿದ್ವಾರಿಂ ಪುನರ್-ಸುವಾರ್ತಾ ಪ್ರಸಾರ್ ಕರ್‍ತಾತ್. ಸಾದಿ ಆನಿ ಪ್ರಾಚಿತ್ ಉಪಾಸಾಚಿ ಜಿಣ್ಯೆ ರೀತ್ ಹೊ ಮೇಳ್ ವಾಪರ್‍ತಾ.

ಹಾಜ್ರಿ ಆನಿ ವಿಸ್ತಾರಾಯ್:

ಪ್ರಸ್ತುತ್ ದೆಶಾಚ್ಯಾ 6 ರಾಜ್ಯಾಂನಿ ಹ್ಯಾ ಮೆಳಾಚಿಂ 8 ಕೊವೆಂತಾಂ ವಾ ಸಮುದಾಯ್ ಆಸಾತ್. ಮಹಾರಾಶ್ಟ್ರಾಂತ್ ವಸಯಿಂತ್ ಮುಖೆಲ್ ಘರ್ ಆಸಾ ತರ್ ಮಂಗ್ಳುರ್ ದಿಯೆಸೆಸಿಂತ್ ದೋನ್ ಘರಾಂ ಆಸಾತ್. ಬಜ್ಪ್ಯಾಂ ಸಾಂ ಜುವಾಂವ್ ಪಾವ್ಲ್ ಪೂನ್‌ಶೆತಾಲಾಗಿಂ ಆನಿ ಮಂಗ್ಳುರ್ ದಿಯೆಸಿಜಿಚ್ಯಾ  ಮಾಲ್ಗಡ್ಯಾ ಯಾಜಕಾಂಚಿ ಜತನ್ ಘೆಂವ್ಚ್ಯಾ ಜೆಪ್ಪುಂತ್ಲ್ಯಾ ‘ಸಾಂ ಜುಜೆ ವಾಸ್ ಹೋಮ್’ ಹಾಂಗಾಸರ್. ಥಂಯ್ಸರ್ ತಿಂ ಮಾಲ್ಘಡ್ಯಾ ಯಾಜಕಾಂಚಿ ಜತನ್ ಘೆಂವ್ಚ್ಯಾ ಮಿಸಾಂವಾಂತ್ ಆಸಾತ್. ಕರ್ನಾಟಕಾಚ್ಯಾ ಬೆಳ್ಳಾರಿ ದಿಯೆಸೆಜಿಂತ್, ಕೇರಳಾಚ್ಯಾ ತಲಶೇರಿ ದಿಯೆಸೆಜಿಚ್ಯಾ ಕುಂಬ್ಳಾಂತ್, ಆಂದ್ರ ಪ್ರದೇಶಾಚ್ಯಾ ಶ್ರೀಕಾಕುಳಂ ದಿಯೆಸೆಜಿಂತ್, ಜಮ್ಮು ದಿಯೆಸೆಜಿಚ್ಯಾ ಲೇ-ಲಡಕಾಂತ್ ಹ್ಯಾ ಮೆಳಾಚಿಂ ಘರಾಂ ಆಸಾತ್. ಒರಿಸ್ಸಾಂತ್ ಆತಾಂ ಏಕ್ ಮಿಸಾಂವ್ ಘರ್ ಸುರ್ವಾತ್ ಜಾತಚ್ ಆಸಾ.

ಮಾಹೆತ್: ಭ| ಫಿಲೊಮಿನಾ ಲೋಬೊ ಎಮ್‌ಎಸ್‌ಜೆ